Айни кунларда Жанубий Кореянинг Жинжа шаҳри мери жаноб Жо бошчилигидаги делегация мамлакатимизда бўлиб турибди.
Куни кеча Оҳангарон тумани ҳокими Абдурасул Абдуллаев делегация аъзоларини қабул қилди. Учрашув «Эйвалек» қўрғонида барпо этилган “JINJUZ SILK Co” хорижий корхонасида бўлиб ўтди.
Дастлаб меҳмонлар пиллани қайта ишлашга мўлжалланган ушбу корхона фаолияти ва у ердаги шароитлар билан яқиндан танишишди. Сўнгра томонлар корхона маъмурий биносида музокаралар столига ўтиришди.
Ўзаро суҳбат бошида туман ҳокими Абдурасул Абдуллаев кореялик ҳамкасбининг туманимизга ташрифидан мамнун эканлигини таъкидлаб, Оҳангарон туманининг ўзига хос хусусиятлари, бу ердаги шарт-шароитлар, аҳолининг турмуш тарзи, яратилаётган имкониятлар, сўнгги йилларда олиб борилаётган кенг кўламли ислоҳотлар ҳақида тўхталди. Шунингдек, туман раҳбари Ўзбекистон Республикасининг хорижий ҳамкорлари орасида Жанубий Корея алоҳида ва муҳим ўрин тутиши, икки халқнинг бир-бирига ўхшаш жиҳатлари кўплигига алоҳида урғу бериб, кореялик дўстлар билан ҳамкорлик янада юқори босқичларга чиқаётганлигини айтиб ўтди.
Ўз ўрнида жаноб Жо туман ҳокими томонидан илиқ кутиб олингани, туманда олиб борилаётган ислоҳотлар, шунингдек, пиллани қайта ишлаш борасидаги саъй-ҳаракатларига юқори баҳо бериб, бундан кейин ҳам икки томонлама ҳамкорлик алоқалари янада мустаҳкамланиб боришига ишонч билдирди.
Айтиб ўтиш жоизки, Жанубий Кореянинг Жинжа шаҳри пиллани қайта ишлаш ва ундан мато тўқиб чиқариш бўйича дунёдаги етакчилар қаторида туради. 2019 йилда кореялик ҳамкорлар томонидан Оҳангарон тумани «Эйвалек» МФЙда пиллани қайта ишлашга ихтисослашган этилган “JINJUZ SILK Co” хорижий корхонаси барпо этилган. Корхона қурилиши учун туман ҳокимлиги томонидан 2,5 гектар ер майдони ажратилган. Шунингдек, туман захирасидаги ерлардан корхона учун жами 517,6 гектар, шундан 11,8 гектар суғориладиган, 498,3 гектар тутзор, 0,7 гектар яйлов ва 4,7 гектар бошқа ер майдонлари ажратилган.
Умумий қиймати 5,5 миллион долларга тенг бўлган ушбу корхона 1 йилда 30-60 тонна пиллани қайта ишлаш қувватига эга. Корхонада қайта ишланган маҳсулот 100 фоиз хорижга экспорт қилинмоқда. Хусусан, корхона 2019 йилда 45,9 минг долларлик, 2020 йилда 640,4 минг долларлик, 2021 йилда 523,1 минг долларлик ипак хом-ашёси экспорт қилган бўлса, жорий йилда ушбу кўрсаткич 690 минг доллар бўлиши кутилмоқда.
Кўтаринки ва дўстона руҳда ўтган музокаралар чоғида туман ҳокими Абдурасул Абдуллаев пиллани қайта ишлаш борасидаги ҳамкорлик алоқалари янада ривожланиб боришини, бу борада ҳамкорларни ҳамиша қўллаб-қувватлашга тайёр эканлигини айтиб ўтди.
Ўз навбатида жаноб Жо қабул учун миннатдорлик билдириб, икки томонлама дўстона ҳамкорлик абадий бўлишини тилаб, туман ҳокимига Жинжа шаҳрининг рамзи бўлган “Yes I Can” деб номланувчи эсдалик совғасини топширди.
Шундан сўнг, хорижлик делегация аъзолари Тошкент шаҳрига кузатиб қўйилди.
