Бу ҳақда Ўзбекистоннинг Америкадаги элчиси Фурқат Сиддиқов маълум қилди.
Фурқат Сиддиқовнинг айтишича, аҳоли учун АҚШ виза режимини енгиллаштириш борасида мунтазам ҳаракат кетмоқда. Кутилган натижага эришиш эса осон кечмаслиги табиий.
“АҚШга визасиз киришга эришиш узоқ вақт талаб этадиган жараён. Лекин бу бўйича музокаралар олиб боряпмиз. Албатта, қанақа виза режимини жорий этиш, қандай шартлар қўйиш Америка ҳукуматининг ички сиёсатига боғлиқ. Ҳозирда нафақат АҚШга, балки Бразилия, Канада ва бошқа давлатларга ҳам аҳолимиз визасиз боришини таъминлаш борасида мунтазам музокаралар кетмоқда”, деди элчи.
Фурқат Сиддиқов бугунги кунда ўзбек-америка муносабатлари тарихий чўққига чиққанини таъкидлади. Икки давлат ўртасидаги ҳамкорликни ривожлантириш учун катта потенциал мавжудлигини айтди.
“Ўтган йилнинг ўзида Ўзбекистон ва Америка президентлари ўртасида тўрт марта мулоқот бўлди. Икки марта телефон қўнғироғи ва икки марта Нью Йорк ҳамда Вашингтонда учрашувлар ташкил қилинди. Бунинг натижасида кенг кўламли келишувларга эришилган. Бу Америка ҳукуматининг Ўзбекистонда бўлаётган ислоҳотларга, мамлакат потенциалига эътиборини, биз билан ҳамкорлик қилишга тайёрлигини кўрсатади”, деди дипломат.
Фурқат Сиддиқов 2026 йил январь ойи якунидан Ўзбекистонда АҚШ фуқаролари учун 30 кунгача бўлган визасиз режим жорий этилишини маълум қилди. Бунинг натижасида мамлакатга океан ортидан келувчи сайёҳлар сони уч баравар кўпайиши кутилмоқда.
