Лойиҳанинг аҳамиятли жиҳати шундаки, у ҳар бир иштирокчида келажакка умид кўзи билан қарашни, мавжуд имкониятлардан унумли фойдаланиш учун етарли шароит борлигини намоён этди.
Илк босқичда нанизм касаллигига чалинган паралимпия спортига қизиқиши бўлган 150 нафарга яқин юртдошимиз Тошкент шаҳрида махсус тиббий текширувдан ўтказилди.
Сўнгра иштирокчилар гуруҳларга бўлинган ҳолда пара пауэрлифтинг, пара енгил атлетика ва пара сузиш спорт турларида ўзларини синаб кўришди.
Мураббийлар айнан мана шу кўрик давомида ҳар бир иштирокчининг имконияти қайси паралимпия спорт турига мос тушиши бўйича хулосага келиб, уларни ушбу спорт тури бўйича мунтазам машғулотларга жалб этади.
Қувонарлиси, иштирокчилардан айримлари ҳатто Осиёда рекорд кўрсаткични қайд этган спортчилар билан тенглаша олиши мумкинлигини ўзлари ҳам билмаган.
Юртдошларимиз ўз ҳаётида янги саҳифа очилаётганини ушбу тадбир орқали ҳис этди.
3 кун давом этган тадбир сўнггида барча иштирокчилар Ўзбекистон Миллий паралимпия қўмитасида жам бўлди. Бу ерда Токио-2020 ёзги Паралимпия ўйинларида айнан мана шу классда ядро улоқтириш бўйича олтин медални қўлга киритган Бобуржон Омонов қатнашди ва ўзи каби спортга илк қадамларини қўяётган инсонларга ўзига ҳос мотивация берди.
Шундан сўнг барча қатнашчилар маданий ҳордиқ олишлари учун қўмита томонидан пойтахтимизнинг диққатга сазовор жойларига саёҳат ташкил этилди. Буларнинг барчаси иштирокчиларга олам-олам қувонч ва унутилмас хотираларни тақдим этди.
Ўзбекистон Миллий паралимпия қўмитаси бу каби саралаш тадбирларини келгусида ҳам давом эттиришни режалаштирган.
