Инесенинг таъкидлашича, Ўзбекистон коррупциядан қутулиш учун “Давлат мансабдорларининг декларация ва манфаатлар тўқнашуви” ҳақидаги қонунни албатта қабул қилиши керак. Латвия коррупция билан курашишни дастлаб шу қонунни қабул қилишдан бошлаган.
“Бу жуда муҳим: халқ ишониши керак, коррупция билан курашишни ҳукумат ўзидан бошлаганига. Давлат хизматчиларининг даромадлари декларация қилиниши лозим. Латвияда 25 йилдан бери давлат хизматчиларининг даромадлари декларация қилинади. Ва барча ривожланган мамлакатларда бундай амалиёт бор, дейди эксперт.
Ҳар қайси мукаммал Конституция амалда ишламаса фойдаси йўқ
Воика Қонунни кучайтириш кераклигини таъкидлади. Унинг фикрича, ввало Конституциянинг амалда ишлаши муҳим. Конституция қанчалик мукаммал бўлмасин, агар у ишламаса ҳеч нарса ўзгармайди.
“Конституция ва қонунларнинг ишлашини эса фақат давлат эмас, жамоатчилик ва айниқса журналистлар назорат қилиши керак, талаб қилиши керак, шундагина нимадир ўзгаради. Биз Латвияда шундай қилдик”.
Пора олмай қўйган “ГАИ”лар
Инесенинг таъкидлашича, Латвияда илгари пора билан “ГАИ”лар кўп қўлга тушган.
“Коррупцияда берувчи ва олувчи қўл бор. Бунга алоҳида аҳамият бериш керак. Қонунлар, жазолар кучайтирилди, “ГАИ” ходимлари пул талаб қилмайдиган бўлишди, аммо пора таклиф қилувчилар барибир бор эди. Жамоатчилик назорати, тушунтириш, тарғибот, қонунлар орқали биз пора олувчи қўлни ҳам берувчи қўлни камайтиришга эришдик. Мен коррупцияни давлат ва жамоатчилик биргаликда бир вақтда назорат қилиши керак, деб ҳисоблайман” деди у.
Маълумот учун: Латвия 1990 йилларнинг ўрталарида давлат хизматчилари декларацияси, очиқ харидлар ва сиёсий партияларни молиялаштириш тўғрисидаги энг муҳим коррупцияга қарши қонунни қабул қилиш, сўнгра коррупцияга қарши кураш бўйича ихтисослашган агентликни ташкил этиш билан порахўрликка қарши курашни бошлаган. Мамлакат сиёсатчилари халқаро ҳуқуқий ҳамжамиятга қўшилиш – Жаҳон банки, Европа Иттифоқи, НАТО ва бошқалар билан халқаро ҳамкорликка катта эътибор қаратган. Мамлакатда ОАВ ва фуқаролик жамияти порахўр сиёсатчиларни ишдан бўшатиш ва коррупцияга қарши ҳалол курашчиларни сақлаб қолишни талаб қилувчи энг муҳим ролда бўлган.
