Ҳодиса бугун, 8 июль куни эрталаб соат 07:00 лар атрофида, «Тошкент-Ўш» халқаро автомобиль йўлининг 242-километрида содир бўлган.
«Қамчиқ» довони орқали ҳаракатланаётган пахта толаси ортилган юк машинаси ҳайдовчиси бошқарувни йўқотиши натижасида йўлнинг қарама-қарши томонига чиқиб кетган. Оқибатда юк машинаси ёниб кетган. Қувонарлиси, машина ҳайдовчиси салондан чиқиб олишга муваффақ бўлган ва шу сабабли жиддий жароҳат олмаган.
ФВВнинг «Қамчиқ» махсус қидирув, ёнғин-қутқарув бошқармаси ходимлари зудлик билан воқеа жойига етиб бориб, бир неча дақиқада ёнғинни бартараф этдилар. ФВВ қутқарувчиларининг тезкор ҳаракатлари натижасида машинага ортилган юкларнинг катта қисми ёнғиндан сақланиб қолинган. Ҳодиса натижасида жабрланганлар йўқ, деб хабар беради Фавқулодда вазиятлар вазирлиги матбуот хизмати.
