Янги тартиблар Президентнинг 2026 йил 22 сентябрдаги ПФ-202-сон Фармони билан белгиланди.
Эндиликда
қарздорлиги сабабли электр энергияси ёки табиий газ тармоғидан узилган
истеъмолчини қайта улаш учун қўшимча тўлов ундирилмайди.
Яъни, қайта
уланишда маиший истеъмолчилардан базавий ҳисоблаш миқдорининг икки баравари,
юридик шахслардан эса 10 баравари миқдорида тўлов талаб этилмайди.
Электр
энергияси учун тарифларда қандай ўзгариш бўлди?
Асосий ва
захира электр таъминотига уланган қувватлари йиғиндиси 750 кВА ва ундан ортиқ
бўлган ҳамда электр энергияси учун табақалаштирилган тариф асосида ҳисоб-китоб
қиладиган истеъмолчилар учун янги тартиб белгиланди.
Бунда сутка уч
даврга бўлинади:
Тунги давр —
22:00 дан 24:00 гача ва 00:00 дан 06:00 гача;
Ярим тиғиз давр
— 09:00 дан 17:00 гача;
Тиғиз давр —
06:00 дан 09:00 гача ва 17:00 дан 22:00 гача.
Янги тартибга
кўра, тунги даврда белгиланган тарифга нисбатан 1,5 баравар камайтирувчи
коэффициент қўллаш бекор қилинди.
Ярим тиғиз
даврда эса белгиланган тариф қўлланилади.
Тиғиз даврда
электр энергияси учун белгиланган тарифга нисбатан 1,5 баравар оширувчи
коэффициент сақланиб қолади.
Шу тариқа,
мазкур тоифадаги истеъмолчилар учун электр энергияси қиймати уни қайси вақтда
истеъмол қилишга қараб ҳисобланади.
Қарзи йўқ
истеъмолчиларга тўловни бўлиб амалга ошириш имкони берилди
Электр
энергияси ва табиий газдан фойдаланиш қоидаларида «намунали истеъмолчилар» учун
ҳам алоҳида тўлов тартиби жорий этилди.
Қарздорлиги
бўлмаган ва замонавий ҳисоблагичлар билан таъминланган истеъмолчилар ҳисобот
ойи бошига қадар 15 фоиз миқдорида олдиндан тўлов қилиши мумкин.
Қолган маблағ
эса ой давомида тўланади.
Бунда
қарздорлик сабабли тармоқдан узилиб қолиш қоидаларни бузиш ҳолати сифатида
баҳоланмайди.
Иссиқхоналар
учун газ тўловида ҳам енгиллик бор
Табиий газдан
фойдаланувчи иссиқхона хўжаликлари учун ҳам алоҳида тўлов тартиби белгиланди.
Унга кўра,
октябрь-март ойларида етказиб бериладиган табиий газ учун 50 фоиз миқдорида олдиндан
тўлов амалга оширилади. Қолган қисми ой якунига қадар тўланади.
Кейинги
ойлардан бошлаб эса 100 фоиз олдиндан тўлов амалга оширилади.
Мазкур тартиб
аввалги ойда қарздорлиги бўлмаган иссиқхона хўжаликларига нисбатан қўлланилади.
Янги
ўзгартишлар электр энергияси ва табиий газдан фойдаланувчилар учун тўлов
тартибини енгиллаштириш, ортиқча харажатларни бартараф этиш ҳамда
ҳисоб-китобларни янада қулайлаштиришга қаратилган.
