Маълум бўлишича, Садоқат маҳалласида яшовчи 1988 йилда туғилган фуқаро А.Ш. ўғли — 2010 йилда туғилган Ў.Ў.нинг хулқида жиддий ўзгаришлар кузатилаётгани, у уйда жанжал қилаётгани ҳамда мактабга боришдан бош тортаётгани ҳақида маҳалла профилактика инспектори, катта лейтенант Жаҳонгир Маҳмудовга мурожаат қилган.
Инспектор ҳолатни ўрганиш учун манзилга борган вақтда ўсмир орқа томондан яқинлашиб, қўлидаги ошхона пичоғи билан унинг чап орқа бел қисмига жароҳат етказган.
Оғир тан жароҳатига қарамасдан, инспектор гумонланувчини зарарсизлантириб, ёрдамчи кучларни чақиртирган. Хонадондагилар хавфсизлиги таъминланган.
Инспектор шифохонага ётқизилиб, унга «кўкрак қафаси чап орқа томони плевра бўшлиғига тешиб ўтган жароҳат, чап томонлама гемопневматоркс, ташқи ва ички қон кетиш» ташхиси қўйилган.
Ҳолат юзасидан Жиноят кодексининг 104-моддаси 2-қисми «б» банди билан жиноят иши қўзғатилиб, гумонланувчи ушланган. Тергов ҳаракатлари давом этмоқда.
