Унда амалга оширилган лойиҳалар ва Ўзбекистондаги ислоҳотлар, жумладан, республикамиз тўқимачилик соҳасида рўй берган муҳим воқеалар бўйича йилнинг дастлабки якунлари сарҳисоб қилинди.
Саммитда фахрий меҳмон сифатида иштирок этган Олий Мажлис Сенати Раиси Танзила Нарбаева тадбирни кириш сўзи билан очар экан «Маълумки, яқин тарихимизда Ўзбекистон дунёнинг энг йирик пахта хом ашёсини етказиб берувчи давлатлардан бири бўлсада, йиллик экспорт тушумимиз бор йўғи 1 миллиард доллар атрофида эди.
Бугунги кунда эса соҳада амалга оширилган кенг кўламли ислоҳотлар натижасида Ўзбекистон жаҳон бозорининг эътироф этилган иштирокчисига айланяпти ва 2021 йилда қиймати 3 миллиард долларга тенг тайёр тўқимачилик маҳсулотларни экспорт қилишга эришди.
Бу иқтисодиётимизнинг янада барқарорлигини таъминлаш ҳамда фуқароларимизга янги иш ўринлари яратиб бериш учун муҳимдир», – дея таъкидлаб ўтди.
Тўқимачилик саммити Халқаро тўқимачилик маҳсулотлари ишлаб чиқарувчилари федерацияси (ITMF), Бирлашган Миллатлар Ташкилоти Европа иқтисодий кенгаши (UNECE), International Trade Center, Германия халқаро ҳамкорлик агентлиги (GIZ) каби етакчи халқаро ташкилотларнинг бевосита иштироки ва кўмагида ўтказилди.
Унда Европа Иттифоқи ва АҚШ, Осиё ва Африка, шунингдек, МДҲ давлатларидан 300 дан ортиқ таниқли жаҳон брендлари ва ритейлерлари, тўқимачилик компаниялари ва уюшмалари раҳбарлари иштирок этди.
Таъкидланганидек, саммит мамлакатимизда тўқимачилик саноатини ривожлантиришга, тўқимачилик маҳсулоти етказиш занжирида барқарорликни таъминлашга, миллий маҳсулотнинг экспорт географиясини янада кенгайтиришга, ҳамкорлар билан янги битимлар тузишга ва янги инновацион лойиҳаларни амалга оширишга йўналтирилгани билан алоҳида амалий аҳамиятга эга.
Ўзбекистон Республикаси Олий Мажлиси Сенати Ахборот хизмати.
