Воқеа жойида полиция томонидан олиб борилган суриштирув ишлари якунлангач, аёл Ўзбекистон фуқароси Дурдона Ҳакимова (37) эканлиги аниқланганди.
Қотилликда Ҳакимованинг ўзбекистонлик йигити (севгилиси) Дилшод Турдимуротов томонидан содир этилганликда гумон қилинмоқда. Унга дўсти Ғофуржон Камолхўджаев ёрдам берган, дейилади ОАВ хабарларида.
Мазкур ҳолат бўйича Ташқи ишлар вазирлиги матбуотхизмати расмий муносабат билдириб, хабарни чуқур қайғу билан қабул қилганини маълум қилди.
Аниқланишича, 2026-йил 24-январ куни соат 19:40 атрофида Истанбул шаҳрининг Шишли туманида чиқиндилар орасидан буюм тўплаб юрган фуқаро контейнер ичида ўралган жасадни кўриб, бу ҳақда ҳуқуқни муҳофаза қилувчи органларга хабар берган. Кўрик жараёнида жасаднинг бош қисми мавжуд эмаслиги қайд этилган.
Бош консулхона томонидан маҳаллий ҳуқуқни муҳофаза қилувчи органлар, суд-тиббий экспертиза маркази ҳамда прокуратура билан ҳамкорликда ўтказилган ўрганишлар натижасида марҳуманинг шахси Ўзбекистон Республикаси фуқароси Ҳакимова Дурдона экани тасдиқланди.
Мазкур ҳолат юзасидан Ўзбекистон Республикасининг 2 нафар фуқароси қўлга олинган. Улар Туркиядан Грузияга авиарейс орқали қочишга уринган вақтида ушланган.
Бош консулхона дипломатлари томонидан марҳуманинг оила аъзолари билан алоқа ўрнатилди ҳамда уларга тегишли консуллик-ҳуқуқий ёрдам кўрсатилмоқда.
Мазкур ҳолат бўйича суриштирув жараёнлари Бош консулхона назоратига олинган.
Бош консулхона ушбу ҳолат юзасидан қўшимча маълумотларни расмий манбалар орқали тақдим этиб боради.
Ўзбекистон Республикасининг Истанбул шаҳридаги Бош консулхонаси марҳуманинг оила аъзолари ва яқинларига чуқур ҳамдардлик билдиради.
