Бу ҳақда Uzbekistan Airports хабар берди.
Қайд этилишича, шу йилнинг 30 март куни Шанхайдан учган MU6037 рейси маҳаллий вақт билан соат 18:00 да Тошкент халқаро аэропортига келиб қўнди.
Бортда 265 нафар йўловчи бўлган самолёт анъанага кўра сув аркаси билан кутиб олинди, экипаж аъзоларига гуллар тақдим этилди. Шунингдек, пойтахт аэропортида Тошкентдан Шанхайга йўл олган илк йўловчилар ҳам тантанали равишда рўйхатдан ўтказилди.
Қатновлар ҳафтасига тўрт марта — душанба, сешанба, пайшанба ва шанба кунлари Airbus A330 самолётларида амалга оширилади. Парвоз давомийлиги тахминан 8 соатни ташкил этади.
Маълумот учун, “China Eastern Airlines” 1988 йилда ташкил этилган бўлиб, штаб-квартираси Шанхай шаҳрида жойлашган Хитойнинг етакчи авиакомпанияларидан бири ҳисобланади.
Авиаташувчи Ўзбекистон бозорига илк бор ўтган йил июль ойида Сиан – Тошкент – Сиан йўналишини очиш орқали кириб келган ва бу йўналиш қисқа вақт ичида йўловчилар орасида оммалашди.
