Давлат хавфсизлик хизмати хабарига кўра, биологик фаол қўшимчалар ишлаб чиқаришга ихтисослашган МЧЖга тегишли манзилда ташкил этилган яширин цехда қалбаки дори воситалари тайёрланиши ва шаҳар дорихоналари орқали сотилиши аниқланди.
Текширув давомида ушбу манзилдан жами 11 дона дори ишлаб чиқариш станоклари, 21 дона дори тайёрлашда керак бўладиган қолиплар ҳамда умумий оғирлиги 389 кг бўлган кукун ва таблеткалар, «Раикал» номли пневматик қурол ва бошқа нарсалар ашёвий далил сифатида олинган.
Шунингдек, МЧЖга тегишли иккинчи манзилда ҳам яширин цех мавжуд бўлиб, ундан дори воситалари ишлаб чиқаришда фойдаланиладиган қолип ва ускуналар, бўш дори капсулалари, қутилари, йўриқномалар, кукун кўринишидаги хом-ашёлар процессуал тартибда расмийлаштириб олинган.
«Фармацевтика маҳсулотлари хавфсизлик маркази» ДМ экспертиза хулосасига кўра, яширин цехда «Урсосан 250 мг», «Нейромидин 20 мг», «Фаниган» дори воситалари қалбакилаштирилган.
Тадбир мантиқий давом эттирилиб, мазкур цехда ишлаб чиқарилаётган дориларни сотиш билан шуғулланувчи ва «Фаниган» дори воситасини қалбакилаштириш бўйича буюртма бериб, 130 кг ушбу дорининг субстанцияларини келтириб берган шахснинг дорихонаси ҳам кўздан кечирилди.
Ушбу дорихонадан «Фаниган», «Азимак», «Сипролет» каби 15 турдаги 1.067 қути қалбаки ҳамда 14 турдаги 274 қути яроқлилик муддати ўтган дорилар аниқланган.
Ҳозирда ноқонуний цех ташкилотчиларининг 3 нафарига нисбатан Жиноят Кодексининг 186-3-моддаси 2-қисми «б» ва «г» бандлари билан жиноят иши қўзғатилиб, тергов ҳаракатлари олиб борилмоқда.
