Ушбу ташаббус мамлакатнинг Экспорт-импорт банкидан 10 миллиард доллар маблағ билан молиялаштирилади.
АҚШ Президенти Дональд Трамп муҳим минераллар захирасини яратилишини эълон қилди. “Бугун биз Америка бизнеси ва ишчилари ҳеч қачон ресурс танқислигидан азият чекмаслигини таъминлаш учун Project Vault, деб номланган лойиҳани ишга туширмоқдамиз”, деди у 2 февраль, душанба куни кечқурун Оқ уйда бўлиб ўтган тадбирда.
Трампнинг сўзларига кўра, лойиҳа асосан автомобиль ишлаб чиқарувчилар ва технология компаниялари учун минералларни сотиб олиш ва сақлаш учун АҚШнинг Экспорт-импорт банкидан 10 миллиард долларлик кредит билан 1,67 миллиард долларлик хусусий капитални бирлаштиради. Давлат раҳбари ушбу захира аввал миллий мудофаа эҳтиёжлари учун ташкил этилганидек, бир хил тамойил асосида яратилишини таъкидлаб, бу ғояни “ажойиб” деб атади.
Шу билан бирга, АҚШ ички ишлар вазири Дуглас Бергам муҳим минераллар савдо клубига “қўшимча 11 та мамлакат” қўшилиши шу ҳафта эълон қилинишини маълум қилди, деб хабар беради Reuters. Трамп маъмуриятининг исми ошкор қилинмаган расмийсининг агентликка берган маълумотига кўра, Hartree Partners, Traxys North America ва Mercuria Energy Group савдо компаниялари захира учун хомашё сотиб олишни бошқаради. Ушбу қадам бизнеснинг Хитойнинг ноёб ер элементларига қарамлигини сезиларли даражада камайтириши кутилмоқда, деб хабар берди dw.com.
