Шу йил 29 июль куни Президентимиз Олмалиқ шаҳрига ташрифи давомида “Jurabek laboratories” қўшма корхонасида ҳам бўлиб, Спутник V ҳамда ZF-UZ-VAС2001 вакциналарини ишлаб чиқариш учун яратилган техник имкониятлар билан танишганди.
Фармацевтика тармоғини ривожлантириш агентлиги матбуот хизмати раҳбари Қизлархон Бегматованинг маълум қилишича, Спутник V вакцинасини тайёрловчи номзод сифатида россиялик ҳамкорларга Ўзбекистондаги бешта йирик фармацевтика компанияси рўйхати тақдим этилган. Хорижлик мутахассислар юртимизга келиб, номзодларнинг ишлаб чиқариш, дори сақлаш салоҳияти ва бошқа зарур ресурслар мавжудлиги билан танишган. Шундан сўнг “Jurabek laboratories” қўшма корхонаси вакцина қадоқлашга муносиб деб эътироф этилган.
Айни пайтда “Jurabek Laboratories” 48 миллион флакон инфузион эритма, 480 миллион ампула, 60 миллион қуруқ антибиотик, 20 миллион лиофилизацияланган дори воситаларини ишлаб чиқариш қувватига эга.
Қўшма корхона томонидан уч юздан зиёд номдаги маҳсулот, жумладан, пандемия шароитида аҳамияти тобора ошиб бораётган ремдесивир, фавипиравир, гепарин, эноксапарин препаратлари ишлаб чиқарилмоқда.
Шу билан бирга, бу ерда қиймати 30 миллион долларлик янги лойиҳага қўл урилган бўлиб, унинг доирасида инсон танасини ёт антигенлардан ҳимояловчи моноклонал антитаначалар шаклидаги дориларни ишлаб чиқариш мўлжалланган.
Айни вақтда ҚК томонидан икки турдаги вакцина ишлаб чиқарилиши режалаштирилган: Спутник V ҳамда ZF-UZ-VAC2001 вакциналаридир.
“Jurabek laboratories” Спутник V вакцинасининг илк валидацион партиясини қуйиш ишларини амалга оширди. Вакцина сифат назоратидан ўтиши учун Н.Ф.Гамалея номидаги Эпидемиология ва микробиология миллий тадқиқот марказига жўнатилиб, марказдан ижобий натижа ҳам олинди. Бу эса “Jurabek laboratories” ҚК томонидан вакцинани қуйиш ишлари йўлга қўйилишига асос бўлиб хизмат қилади.
Вакцинанинг юртимизда тайёрланиши учта муҳим аҳамиятга эга.
Биринчидан, вакцина ҳозирги пандемия шароитида мамлакатларнинг стратегик салоҳияти ва ишлаб чиқариш қувватини намоён этувчи муҳим омил.
Иккинчидан, вакцинани арзон нархда олиш имкониятига эга бўламиз.
Учинчидан, вакцинани муайян ҳароратда сақлаш мураккаб жараён бўлиб, озроқ нотўғри ҳаракат ҳам эмланманинг сифатига салбий таъсир этади. Вакцина мамлакатимизда ишлаб чиқарилса, мана шу хавотирдан қутуламиз.
