Мазкур масала юзасидан Пенсия жамғармаси тушинтириш берди.
Қайд этилишича, Пенсия жамғармаси томонидан молиялаштириладиган маблағлар ҳар йил учун тасдиқланадиган «Ўзбекистон Республикасининг Давлат бюджети тўғрисида»ги Қонуни билан кўзда тутилади.
«2026 йил учун Ўзбекистон Республикаси Давлат бюджети тўғрисида»ги Қонун билан Пенсия жамғармасининг 2026 йил учун харажатлари тасдиқланганлигини инобатга олиб, январь ойи пластик карталари орқали олувчи фуқароларнинг пенсия тўловлари 5 январдан бошлаб юкланади.
Шу муносабат билан, 2026 йилнинг 5 январь кунидан бошлаб Пенсия жамғармаси томонидан пенсия тўловлари учун маблағлар пенсия етказиб берувчи ташкилотларга молиялаштириб берилиши бошланади.
Бунда январь ойи пенсия тўловлари 2026 йилнинг 5 январь куни банк пластик карталарга юклаб берилиши ҳамда 27 январь санасига қадар нақд шаклда пенсия олувчиларга Халқ банкининг сайёр кассалари томонидан кунлик график асосида маҳалла фуқаролар йиғинлари орқали ёки фуқароларнинг яшаш манзилига етказиб берилади.
Фуқаролар пенсиялар бўйича саволлар юзага келган тақдирда Пенсия жамғармасининг 1271 ишонч телефонига мурожаат қилишлари мумкин.
