Бу эса ўз навбатида, Тиббий-ижтимоий хизматларни ривожлантириш агентлиги Тошкент шаҳар бошқармаси зиммасига ҳам жуда шарафли ва ўта масъулиятли вазифа юклади. Буни чуқур англаган, ҳис қилган бошқарма ва унинг туман бўлимлари ходимлари алоҳида рўйхатга олинган, ўзгалар парваришига муҳтож, якка-ёлғиз ҳамда ёлғиз истиқомат қилувчи пенсионер ва ногиронлиги бўлган шахслар ҳолидан доимий хабар олиш тизимини янада кучайтиришга интилмоқда. Ҳокимиятлар ва фуқароларнинг ўзини ўзи бошқариш органлари билан ҳамкорликда ўзгалар парваришига муҳтож ёлғиз кексалар ва ногиронлиги бўлган шахсларга уйида ижтимоий-маиший хизмат кўрсатиш бўйича ишларни янада такомиллаштириш борасида саъй-ҳаракатларни амалга оширмоқда.
— Айтиш жоизки, бошқарманинг 70 нафар ижтимоий ходими 600 нафардан зиёд алоҳида рўйхатга олинган, ўзгалар парваришига муҳтож, якка-ёлғиз ҳамда ёлғиз истиқомат қилувчи пенсионер ва ногиронлиги бўлган шахсларнинг ҳолидан хабар олиб, уларнинг уйида ижтимоий-маиший хизмат кўрсатмоқда, — дейди Тиббий-ижтимоий хизматларни ривожлантириш агентлиги Тошкент шаҳар бошқармаси бошлиғи Роҳатой Набиева. — Ногиронлиги бўлган, ёлғиз ва якка ёлғиз кексаларнинг ёнида туриб, ғамхўрлик кўрсатаётган, уларга далда бўлиб, ҳаётини мазмунли қилишга, умрини узайтиришга ҳисса қўшаётган, фақат эзгулик йўлида олға интилаётган меҳрибон опа-сингилларни ҳар томонлама рағбатлантириш, қўллаб-қувватлар мақсадида ҳар икки йилда “Йилнинг энг яхши ижтимоий ходими” касбий кўрик-танлови ташкил этиб келинади.
Дарвоқе, жуда кўтаринки руҳда ўтказилган танловнинг Тошкент шаҳар босқичида иштирок этган ҳар бир ходим тиббий-ижтимоий хизматларни ривожлантириш тизимида шижоат ва фидойилик намуналарини кўрсатиб меҳнат қилаётганини намоён этди.
Таъкидланишича, 2021 йил апрель ойида “Йилнинг энг яхши ижтимоий ходими” касбий кўрик-танловининг туман босқичларини ўтказиш бўйича чора-тадбир режаси ишлаб чиқилган. Тадбирларда 70 нафар ижтимоий ходим иштирок этган. Кўрик-танловнинг туман босқичларида ғолибликни қўлга киритган 11 нафар аёл-қиз Тошкент шаҳар босқичида қатнашиш ҳуқуқини қўлга киритган. Ушбу иштирокчилар кўрик-танловнинг республика босқичига йўлланма олиш учун дўстона, соғлом рақобат асосида кураш олиб борди.
Беллашув жараёнлари, кўрик-танлов шартлари ва ижтимоий ходимларнинг соҳага оид билими, норматив ҳужжатларни билиш даражаси ҳамда зукколиги нуфузли ҳакамлар ҳайъати томонидан муносиб баҳолаб борилди. Ўз ишида ҳам, оила ва жамиятда ҳам фаол ва ташаббускор ижтимоий ходимларнинг юксак ҳамда масъулиятли меҳнатлари хусусида ижобий фикрлар билдирилди. Барча шартларда фаол иштирок этиб, юқори натижаларга эришган иштирокчилар ҳамкор ташкилотларнинг эсдалик совғалари билан тақдирланди. Умрини якка ёлғиз ҳамда ёлғиз истиқомат қилаётган инсонларга хизмат қилишдек олижаноб ишга бағишлаган ижтимоий ходималарнинг саъй-ҳаракатлари, меҳнати ва матонати юксак таҳсинга, эътиборга, эътирофга, эҳтиромга лойиқдир. Биринчи ўринни эгаллаган иштирокчи эса кўрик-танловнинг республика босқичида иштирок этадиган бўлди.
Анвар ҚОБИЛОВ,
журналист
