Мазкур газеталар ўзбек журналистикасининг бардавом ривожида тамал тоши вазифасини ўтаган босма матбуотлардан биридир. Бир нашрнинг 100 йиллик довондан ошиб ўтиши айтишгагина осон. Ўтган даврда бу даргоҳдан қанчадан-қанча фидоий, жонкуяр журналистлар етишиб чиқди ва мамлакатимиз тараққиётига ўз ҳиссасини қўшди.
Шуни ишонч билан айтиш мумкинки, ўз сўзига, ўз юзига, ўз мактабига эга бўлган мазкур газеталар миллий журналистика, хусусан, жадидчилик фаолиятининг туб илдизларидан озуқа олиб туради.
Ўтган машаққатли вақт давомида ижтимоий-маърифий, сиёсий-иқтисодий янгиликларни ёритишда минбар бўлиб келган мазкур нашрлар бугун ҳам анъана ва тамойиларига содиқ қолган ҳолда, уларни замонавий тенденциялар асосида ўқувчиларига етказиб келмоқда.
«Зарафшон» газетасининг бугунги мақсадидан келиб чиқадиган бўлсак, у миллий ғоямизга, жумладан миллий истиқлолимиз ғоясининг тарихий кўриниши - жадидлар ғоясига, орзусига ҳамоҳанг эканлигини кўрамиз.
Фурсатдан фойдаланиб, “Янги Ўзбекистон” ва “Правда Востока” газеталари таҳририяти номидан “Зарафшон” ва “Самаркандский вестник” газеталарида фаолият юритаётган барча жонкуяр журналистларга камоли эҳтиром ила ижодий баркамоллик, сиҳат-саломатлик, шарафли меҳнатларида муваффақиятлар тилаймиз!
