Бу ҳақда Рақамли технологиялар вазирлиги ахборот хизмати маълум қилди.

Қайд этилишича, “GSMA M360 Eurasia” халқаро форуми доирасида Рақамли технологиялар вазири Шерзод Шерматов ҳамда Viasat компаниясининг минтақавий вице-президенти Ҳилми Текинсой ўртасида учрашув бўлиб ўтди.

Мулоқот чоғида Ўзбекистонда сунъий йўлдош алоқа технологияларини ривожлантириш, чекка ҳудудларда интернет қамровини кенгайтириш ва телекоммуникация инфратузилмасини модернизация қилиш масалалари муҳокама қилинди.

Шунингдек, томонлар учрашувда D2D технологиясининг имкониятлари ва техник хусусиятлари юзасидан фикр алмашилди.

Шунингдек, мамлакатда пилот лойиҳаларни амалга ошириш, дастлаб айрим ҳудудларда синов тариқасида жорий этиш ҳамда кейинчалик ушбу ечимларни республика миқёсида кенгайтириш истиқболлари кўриб чиқилди.

Музокаралар давомида Viasat томонидан Ўзбекистон учун истиқболли миллий сунъий йўлдош ечимларини қўллаб-қувватлаш масалалари ҳам муҳокама қилинди. Компания вакиллари бундай лойиҳа мамлакатнинг космик технологиялар соҳасидаги салоҳиятини ошириш ва қўшни минтақаларни ҳам қамраб олиш имконини беришини таъкидлади.

Якунда томонлар рақамли инфратузилма, сунъий йўлдош технологиялари ва инновацион телекоммуникация хизматлари соҳасида ҳамкорликни янада кенгайтиришдан манфаатдор эканини билдирди.