Bu haqida Raqamli texnologiyalar vazirligi axborot xizmati maʼlum qildi.

Qayd etilishicha, “GSMA M360 Eurasia” xalqaro forumi doirasida Raqamli texnologiyalar vaziri Sherzod Shermatov hamda Viasat kompaniyasining mintaqaviy vitse-prezidenti Hilmi Tekinsoy o‘rtasida uchrashuv bo‘lib o‘tdi.

Muloqot chog‘ida Oʻzbekistonda sunʼiy yoʻldosh aloqa texnologiyalarini rivojlantirish, chekka hududlarda internet qamrovini kengaytirish va telekommunikatsiya infratuzilmasini modernizatsiya qilish masalalari muhokama qilindi.

Shuningdek, tomonlar uchrashuvda D2D texnologiyasining imkoniyatlari va texnik xususiyatlari yuzasidan fikr almashildi.

Shuningdek, mamlakatda pilot loyihalarni amalga oshirish, dastlab ayrim hududlarda sinov tariqasida joriy etish hamda keyinchalik ushbu yechimlarni respublika miqyosida kengaytirish istiqbollari ko‘rib chiqildi.

Muzokaralar davomida Viasat tomonidan Oʻzbekiston uchun istiqbolli milliy sunʼiy yoʻldosh yechimlarini qo‘llab-quvvatlash masalalari ham muhokama qilindi. Kompaniya vakillari bunday loyiha mamlakatning kosmik texnologiyalar sohasidagi salohiyatini oshirish va qo‘shni mintaqalarni ham qamrab olish imkonini berishini taʼkidladi.

Yakunda tomonlar raqamli infratuzilma, sunʼiy yoʻldosh texnologiyalari va innovatsion telekommunikatsiya xizmatlari sohasida hamkorlikni yanada kengaytirishdan manfaatdor ekanini bildirdi.