Ҳолатҳои инфексияи инвазивии менингококк дар ИМА, Норвегия, Британияи Кабир ва Фаронса ба қайд гирифта шудаанд. Боиси нигаронии хос аст, ки ин сироят дар афроде, ки ба Арабистони Саудӣ ҳаҷ кардаанд, ошкор шудааст.

Аломатҳои инфексияи инвазивии менингококк табларза, қайкунӣ, хоболудии шадид, ошуфтагӣ ва доғи хос дар тамоми бадан мебошанд. Илова бар ин, дарди сар, рагкашӣ, нафрат аз рӯшноӣ ва шахшавии мушакҳои пушти сар пайдо мешаванд.

Муҳим он аст, ки аз лаҳзаи сироят то марг танҳо 24 соат мегузарад, аз ин рӯ табибон аз сайёҳон, бахусус онҳое, ки нияти зиёрати Арабистони Саудиро доранд, даъват мекунанд, ки хеле ҳушёр бошанд.

Ба сайёҳон тавсия дода мешавад, ки ба қоидаҳои гигиена риоя кунанд, ҳама ваксинаҳои заруриро гиранд ва пеш аз сафар бо духтурон хусусан онҳое, ки бемориҳои музмин доранд, машварат кунанд.

Маркази аврупоӣ оид ба пешгирӣ ва назорати бемориҳо қайд мекунад, ки инфексияи инвазивии менингококк як сирояти ниҳоят хатарнок аст ва аз сайёҳон даъват мекунад, ки ҳангоми боздид аз минтақаҳое, ки ҳодисаҳои ин беморӣ ба қайд гирифта шудаанд, ба саломатии худ таваҷҷуҳи бештар зоҳир кунанд.