Дар ин ҳамоиши бонуфуз, ки «Маҷлиси бародарии инсонӣ» ном дорад, бонувони аввали мамлакатҳои гуногун, барандагони Ҷоизаи Нобел, роҳбарони оҷонсиҳои СММ ва созмонҳои пешбари байналмилалӣ, сиёсатмадорони баландмақоми Амороти Муттаҳидаи Араб ва кишварҳои Халиҷ, вазирон ва арбобони давлатӣ, инчунин олимони пешсаф дар соҳаи этикаи технология ва зеҳни сунъӣ, дар маҷмӯъ, 150 меҳмони бонуфуз иштирок карданд.
Роҳбари Администратсияи Президенти Ҷумҳурии Ӯзбекистон Саида Мирзиёева дар доираи форум дар сессияи якум таҳти унвони «Роҳбарии занон дар меҳвари бародарии инсонӣ» маърӯза кард.
Дар ҷараёни суханронӣ ғояи ҳимояи роҳбарии занон ва ҳуқуқ ба таҳсил ҳамчун яке аз меъёрҳои асосии қадру қимати инсонӣ пешбарӣ гардид. Ба ин маъно, бо истинод ба ислоҳоте, ки дар Ӯзбекистон татбиқ мешаванд, таъкид шуд, ки ҳифзи иҷтимоии занон ва таъмини иштироки фаъоли онҳо дар ҳаёти ҷомеа на танҳо ба рушди миллӣ, балки ба таҳкими фазои сулҳ ва ҳамдигарфаҳмӣ дар тамоми минтақа хизмат мекунад.
«Рушде, ки бар эҳтироми мутақобил асос наёфтааст, пойдор нахоҳад монд. Ҷомеаҳои қавӣ на танҳо ба қонунҳо, балки ба эътимоди мутақобили байни инсонҳо низ такя мекунанд. Ин эътимод бошад, аксаран тавассути роҳбарӣ ва муносибатҳои байниҳамдигарии занон таҳким меёбад», — гуфт Саида Мирзиёева.
