Имрӯз дар Донишгоҳи давлатии тиббии Тошканд маросими супурдани унвонҳои фахрӣ, орден ва медалҳо ба соҳибони онҳо баргузор гардид.

Дар байни мукофотонидашудагон табибони ҷавон, ки дар донишгоҳҳои пешқадам ва хориҷи кишвар таҳсил карда, кор омӯхтаанд, инчунин ҳамкорони хориҷӣ, ки дар тақвияти саломатии аҳолии кишвар саҳми калон доранд, низ ҳастанд.

Зикр шуд, ки дар кишвари мо ислоҳот бо суръати баланд ба роҳ монда мешавад, ки онҳо ба рушди устувори иқтисодиёт, эҷоди ҷойҳои корӣ ва манбаи даромад, таълими муосири ҷавонон ва тақвияти саломатии аҳолӣ равона гардидаанд.

Дар натиҷа иқтидори муассисаҳои звенои ибтидоии тиббӣ 60 фоиз зиёд шуда, кумаки тиббӣ ба аҳолӣ хеле наздик гардид. Зиёда аз 400 усули баландтехнологӣ дар ташхис ва табобат, ки қаблан асосан дар пойтахт татбиқ мешуданд, ҳоло дар минтақаҳо низ ҷорӣ шудаанд. Садҳо ҷарроҳии мураккаб дар сатҳи вилоятҳо ва дахолатҳои каминвазивӣ дар сатҳи ноҳияҳо анҷом дода мешаванд.

– Бори аввал дар 45 ноҳияи кишвар ҷарроҳии кӯчондани гурда ба роҳ монда шуд – ин шаҳодати равшани фаъолияти амалӣ дар ҳифзи саломатии инсон мебошад, – гуфт Президент. – Дарозии умр дар кишвари мо афзудааст: барои мардон – аз 71 то 73 сол ва барои занон – аз 76 то 77,5 сол. Ин дастоварди бузурги муштарак аст. Дар ин корҳои нек саҳми арзанда ба зиёда аз 600 ҳазор корманди соҳаи тандурустӣ тааллуқ дорад ва ҳар қадар миннатдорӣ баён намоем, кам хоҳад буд.

Президент ҷоизаҳои давлатиро тантанавӣ супурда, мукофотонидашудагонро аз номи тамоми мардуми кишвар табрик намуд.