Хонум Орелия Бушез барои истиқболи самимӣ изҳори сипос намуда, қайд кард, ки зебоии шаҳр, бахусус манзараҳои шабона ӯро мафтун кардааст ва ба шарофати рушди устувори ҳаёти соҳибкорӣ дар пойтахт ширкатҳои бонуфузи фаронсавӣ кор мекунанд. Байни мамлакатҳоямон ҳамкории наздик баъд аз ташрифи Президенти Ӯзбекистон Шавкат Мирзиёев ба Фаронса ба сатҳи баланд баромад.
Дар рафти суҳбат Ҷ. Ортиқхӯҷаев дар бораи дигаргуниҳои мусбате, ки солҳои охир дар Ӯзбекистон ва махсусан, дар Тошкент ба амал меоянд, сухан ронд. Ҳоким таъкид кард, ки ҳамкорӣ бо ширкатҳои бузурги фаронсавии «Suez» ва «Veolia Central & Eastern Europe» дар соҳаи коммуналӣ ва идоракунии захираҳои об босуръат инкишоф меёбад. Хонум сафир ҳавасмандии худро ба таҳкими робитаҳои дӯстонаи байни Тошканд ва Страсбург изҳор дошт.
Ҳокими Тошканд қайд кард, ки пас аз пандемия аз Париж ба Тошканд омадани сайёҳон коҳиш наёфта, сокинони Ӯзбекистон низ, дар навбати худ, ба фарҳанги фаронсавӣ таваҷҷӯҳи зиёд зоҳир мекунанд: дар бисёре аз мактабҳои миёнаи Тошканд забони фаронсавӣ таълим дода мешавад ва дар рӯзҳои наздик гурӯҳе аз ҷавонон барои таҳсил дар соҳаи HoReCa ба Фаронса мераванд ва маъруфияти таомҳои фаронсавӣ ва атриёт бесобиқа аст.
Ҷ.Ортиқхӯҷаев пешниҳод кард, ки барои табодули таҷриба бо намояндагони доираҳои тиҷоратӣ ва соҳибкорони Фаронса бо мақсади ҷалби ширкатҳои бонуфуз ва маъруф ба ҳамкорӣ дар шаҳри Тошканд форум баргузор карда шавад. Ширкатҳои фаронсавӣ аллакай дар Тошканд лоиҳаҳоро амалӣ мекунанд, аз ҷумла, дар Технопарки пойтахт истеҳсоли ҳисобкунакҳои электронии об ба роҳ монда шудааст.
Хонум сафир тасдиқ кард, ки бисёре аз ширкатҳои маъруфи фаронсавӣ ба ҳамкорӣ манфиатдоранд ва итминон дод, ки Агентии рушди Фаронса, ки дар Ӯзбекистон фаъолият мекунад, барои ҳамкорӣ боз аст. Орелия Бушез бо қаноатмандӣ таъкид намуд, ки Тошканд барои сайёҳон аз Фаронса ва Аврупо маркази сайёҳӣ боқӣ мемонад ва изҳори омодагӣ намуд, ки тамоми пешниҳодҳои ҳокими Тошкандро дастгирӣ менамояд, хабар медиҳад хидмати матбуоти ҳокимият.
