Вазири барқарорсозии иқтисодии Ҷопон Ясутоси Нисимура, ки фаъолияти ситоди марказии мубориза бо паҳншавии сироятро ҳамоҳанг мекунад, дар ин бора рӯзи панҷшанбе дар ҷаласаи комиссияи коршиносон ба рӯзноманигорон иттило дод, хабар медиҳад ТАСС.
«Дар Токио тамоюли афзоиши шумораи сироятҳо идома дорад, илова бар ин, штамми "делта" паҳн мешавад. Дар ҳамин ҳол, мавсими тобистон, вақте ки фаъолияти аҳолӣ меафзояд, оғоз меёбад. Барои нигоҳ доштани сироят ва ҳифзи низоми тандурустӣ, мо аз 12 июл то 22 август режими вазъияти фавқулодда ҷорӣ мекунем », - гуфт ӯ.
Ҳамин тариқ, режими вазъияти фавқулодда дар Токио дар давоми баргузории Бозиҳои тобистонаи олимпӣ, ки аз 23 июл то 8 августи соли равон дар пойтахти Ҷопон баргузор мешавад, амал мекунад.
Нисимура инчунин эълом дошт, ки дар ҳамон давра Девони Вазирон режими вазъияти фавқулоддаро дар префектураи ҷанубии Окинава дароз мекунад. Ғайр аз ин, чораҳои пурзӯршуда бар зидди паҳншавии сироят дар префектураҳои шарқии Тиба, Сайтама ва Канагава, инчунин Осакаи ғарбӣ то 22 август тамдид карда мешаванд.
Дар Токио режими вазъияти фавқулодда то 20 июн амал мекард, сипас дар пойтахт то 11 июл режими пурзӯршуда бар зидди паҳншавии сироят ҷорӣ карда шуд. Чунин чораҳо нисбат ба режими вазъияти фавқулодда каме сабуктаранд, аммо дар ҳарду ҳолат, пешбинӣ шудааст, ки соатҳои кушодани тарабхонаҳо, барҳо ва муассисаҳои фароғатӣ, инчунин фурӯши машрубот маҳдуд карда шаванд.
Тибқи иттилои Вазорати тандурустии Ҷопон, 7 июл дар Токио 920 ҳолати сироятёбӣ ошкор шудааст, ки ин нисбат ба ҳафтаи пеш 206 нафар зиёдтар аст. Бори охир дар пойтахт 13 май дар як рӯз беш аз 900 ҳолати сироятёбӣ ба қайд гирифта шуда буд.
