2021/2022 oʻquv yili uchun Prezident maktablariga jami 1632 nafar oʻquvchini qabul qilish rejalashtirilmoqda. Bu haqda Prezident, ijod va ixtisoslashtirilgan maktablarni rivojlantirish agentligi xabar bermoqda.
Pandemiya sabab 2020/2021 oʻquv yili uchun Toshkent, Namangan, Nukus va Xiva shaharlarida joylashgan Prezident maktablariga oʻquvchilar qabuli qoldirilgan edi.
Navbatdagi 2021/2022 oʻquv yilida esa ushbu maktablarning 5−6 sinflariga 24 nafardan oʻquvchilar qabul qilinadi.
Vazirlar Mahkamasining tegishli qarori bilan Prezident maktablariga respublika umumtaʼlim muassasalarining toʻrtinchi (birinchi oʻquv yilida — toʻrtinchi — toʻqqiz) sinf bitiruvchilari orasidan qobiliyatli va iqtidorli baholar tabeli asosida tegishli STEAM fanlari:
- matematika;
- biologiya (tabiatshunoslik);
- informatika va axborot texnologiyalari;
- fizika;
- algebra;
- geometriya;
- kimyo boʻyicha aʼlo bahoga tugatgan oʻquvchilar tanlov asosida qabul qilinadi.
Oʻzbekiston prezident Shavkat Mirziyoyev 29-dekabrda parlamentga yoʻllagan murojaatnomasida 2021-yilda jami 10 ta Prezident maktabi bunyod etilishini taʼkidlangan edi.
Avvalroq, Andijon viloyatidagi Prezident maktabi shahar hokimiyati va “Andijonnoma” tahririyati oʻrnida qurilishi aytilgan edi.
