Joriy oʻquv yilida talabalikka tavsiya etilmagan, biroq tabaqalashtirilgan (super) toʻlov-shartnoma asosida oʻqish istagini bildirgan abituriyentlar uchun yanada qulaylik yaratish maqsadida onlayn shaklda ariza qoldirish hamda tabaqalashtirilgan toʻlov-shartnomalarni onlayn olish imkonini beruvchi t-kontrakt.edu.uz axborot tizimi ishga tushirildi.
Ushbu tizim:
- ortiqcha ovoragarchilik va suiisteʼmolchiliklarning oldini olish;
- jarayonlarning ochiqligi va shaffofligini taʼminlash;
- elektron arizalarni avtomatik shakllantirish;
- toʻlov-shartnomalarni avtomatik rasmiylashtirish imkonini beradi.
Endi abituriyentlar oliy taʼlim muassasasiga ovora boʻlib, borib oʻtirishlari shart emas. Tizim yordamida ularning maʼlumotlari va toʻplagan bali Davlat test markazi bazasidan toʻgʻridan-toʻgʻri olinib, elektron koʻrinishdagi ariza asosida elektron toʻlov-shartnoma avtomatik rasmiylashtiriladi.