Qayd etilishicha, londonlik mutaxassislar saʼy-harakati bilan koʻrlikni keltirib chiqaruvchi kamyob genetik kasallik — tugʻma Leber amavroziga chalingan 4 nafar bolaning qorachiqlariga nur qaytdi.
Buning uchun koʻrish qobiliyatidan bebahra tugʻilgan oʻgʻil-qizlarning koʻz sohasida ilk bor oʻta noyob hisoblangan gen mikroxirurgik operatsiyasi oʻtkazildi.
Bemorlar — AQSH, Turkiya va Tunisda dunyoga kelgan kichkintoylar. Ular AIPL1 genidagi nuqson tufayli tugʻilganidan buyon koʻrish qobiliyatiga ega emas edi.
London klinikalaridan birida oʻtkazilgan 60 daqiqalik operatsiyada zararsiz virus bilan qoplangan AIPL1 genining sogʻlom versiyasi mikrojarrohlik usuli yordamida jajji bemorlar koʻz toʻr pardasiga joylashtirildi.
Londonlik oftalmolog, professor Mishel Mixaelidesning fikricha, ushbu natijalar hayratlanarli hamda kelgusida gen terapiyasi imkoniyatlaridan yanada kengroq foydalanish uchun asos boʻladi.
