Majlisda senatorlar, mahalliy Kengashlar doimiy komissiyalari raislari, Yoshlar parlamenti a’zolari, Qo‘mita huzuridagi ekspertlar guruhi a’zolari, qonun tashabbuskorlari, mutasaddi vazirlik va idoralar vakillari ishtirok etdi.
«O‘zbekiston Respublikasining ayrim qonun hujjatlariga shaxsning huquq va erkinliklarini ishonchli himoya qilish kafolatlarini yanada kuchaytirishga qaratilgan o‘zgartirish va qo‘shimchalar kiritish to‘g‘risida»gi Qonun muhokama etildi.
Mamlakatimizda amalga oshirilayotgan islohotlar natijasida sud-tergov amaliyotida insonning huquq va erkinliklarini himoya qilish kafolatlarini ta'minlashga qaratilgan ilg‘or va samarali mexanizmlar yo‘lga qo‘yilyapti.
Jumladan, mazkur Qonun bilan jinoyat sodir etganlikda ayblanayotgan shaxsning erkinlik va shaxsiy daxlsizlikka oid konstitutsiyaviy huquqlarini sud tomonidan ishonchli ta’minlash maqsadida jinoyat ishlari bo‘yicha tuman, shahar sudlarida tergov sudyasi lavozimi joriy etiladi.
Tergov sudyalari tomonidan jinoyat ishlari bo‘yicha sudga qadar ish yuritish bosqichida protsessual qarorlarga sanksiya berish va ma'muriy huquqbuzarliklar to‘g‘risidagi ishlarni ko‘rib chiqish masalalarini qonunchilikda belgilash uchun tergov sudyalarining vakolatlari jumlasiga kiritilgan ishlarni ko‘rib chiqish asoslari hamda tartibini nazarda tutuvchi o‘zgartirish va qo‘shimchalar kiritilyapti.
Qo‘mita majlisida «Iqtisodiy jinoyatlarga qarshi kurashish tizimi takomillashtirilishi munosabati bilan O‘zbekiston Respublikasining ayrim qonun hujjatlariga o‘zgartirish va qo‘shimchalar kiritish to‘g‘risida»gi Qonunni ham ko‘rib chiqildi.
Ta’kidlanganidek, Bosh prokuratura huzuridagi Iqtisodiy jinoyatlarga qarshi kurashish departamentining zimmasiga byudjet to‘g‘risidagi qonunchilik buzilishlarining profilaktikasini ta’minlash, iqtisodiy jinoyatlarni o‘z vaqtida fosh etish, har tomonlama, to‘liq va xolisona tergov qilish sohasida qo‘shimcha vazifalar yuklatildi.
O‘z navbatida, muhokamadagi Qonun bilan Jinoyat-protsessual kodeksi va «Korrupsiyaga qarshi kurashish to‘g‘risida»gi Qonunga Departamentning jinoyat ishlari bo‘yicha tergovni yuritish borasidagi vakolatlari aniqlashtirilishini nazarda tutuvchi o‘zgartirish va qo‘shimchalar kiritilayotganligi ta’kidlandi.
Shuningdek, Qonunga muvofiq Ma'muriy javobgarlik to‘g‘risidagi kodeks va Byudjet kodeksga Iqtisodiyot va moliya vazirligi davlat moliyaviy nazorati organlarining vakolatlari Bosh prokuratura huzuridagi Iqtisodiy jinoyatlarga qarshi kurashish departamenti Davlat moliyaviy nazorati inspeksiyasining zimmasiga yuklatilishini nazarda tutuvchi o‘zgartirishlar kiritilayotganligi alohida qayd etildi.
Muhokama jarayonida senatorlar tomonidan mazkur Qonun sohada qonuniylikni, qonunlar normalarining aniq va bir xil qo‘llanilishini ta’minlashga, shuningdek sud-huquq sohasida amalga oshirilayotgan islohotlarni huquqiy jihatdan ta’minlashga xizmat qilishi qayd etildi, deb xabar beradi Oliy Majlis Senati matbuot xizmati.
Majlis yakunida Qo‘mitaning tegishli qarorlari qabul qilindi.
