Germaniya banki delegatsiyasi “Oʻzbeknenftgaz” AJda ayni paytda amalga oshirilayotgan loyihalar, transformatsiya jarayonlari, iqtisodiy barqarorlikka erishish borasida tatbiq etilayotgan islohotlar bilan tanishtirildi.
Shuningdek, xorijiy bank tomonidan kredit loyihalari riskini hisobga olish, istiqbolli loyihalarni moliyalashtirish boʻyicha amalga oshirilayotgan sindikatlashgan kredit loyihasining joriy holati va “Oʻzbekneftgaz” AJ tomonidan xalqaro moliya bozoriga joylashtirilgan yevrobondlar boʻyicha tahliliy maʼlumotlar berildi.

Ayni paytda “Deutsche Bank AG” tomonidan “Oʻzbekneftgaz” AJ bilan axborot almashish tezkorligini yoʻlga qoʻyish maqsadida elektron platforma yaratish boʻyicha konsepsiya loyihasi tayyorlanyapti. Kelgusida ushbu platforma Oʻzbekiston investitsiya bozori jozibadorligini oshirish va sarmoyadorlarni jalb etish, bank tomonidan taklif etiladigan moliyaviy instrumentlarni muhokama etish maydoniga aylanadi.
Muzokaralar yakunida tomonlar hamkorlikni rivojlantirish va qoʻshma loyihalarni moliyalashtirish boʻyicha aloqalarni yanada kengaytirishdan manfaatdorligini bildirdi, deb xabar beradi “Oʻzbekneftgaz” AJ matbuot xizmati.
Maʼlumot oʻrnida: “Deutsche Bank AG” aktivlari boʻyicha Germaniyadagi eng yirik banklardan biri hisoblanadi. Valyuta bozorining asosiy ishtirokchisi boʻlgan bank dunyoning 59 davlatidagi filial va vakolatxonalari orqali 28 million mijozga xizmat koʻrsatib kelyapti.