Yoshlikda qalbda qanday chaqnagan boʻlsa, keksayganda ham yurakning eng nozik qatlamini yoritib turadi. Bu muqaddas Vatan tuygʻusidir.

Vatan insonning bebaho maʼnaviy suyanchi, hayot yoʻli­ni yoʻnaltiruvchi maʼnaviy qutbidir. Inson dunyoga kelib, ongu shuurini anglab, shaxs sifatida kamol topishi, orzu- umidlarini roʻyobga chiqarishi uchun Vatanning oʻrnini hech narsa bosolmaydi. Shu bois, ajdodlarimiz Vatan soʻzini ulugʻlagan, uning shaʼni va sharafini himoya qilishni hayot mazmuniga aylantirgan. Ular yurt ravnaqi yoʻlida bor bi­lim, mahorat va kuchini ayamay, hatto jonini ham fido qi­lishga tayyor boʻlgan.

Bugungi avlodning omadi ana shu ulugʻ anʼanalar me­rosini mustaqil, ozod va erkin yurtda davom ettirayotga­nidir. Bugun biz, tinchlik va farovonlik bagʻrida yashayot­ganlar oʻz baxtimizning qimmatini chuqur his qilishimiz, erkinlik neʼmatidan yanada koʻproq bahramand boʻlishimiz shart.

Yaqin orada xalqimiz uchun eng ulugʻ va eng aziz sana — mustaqillikka erishga­nimizga 34 yil toʻlishi munosabati bilan yurtimizda umumxalq bayrami boʻlib oʻtadi. Bu farahli kunlarda biz, nuroniylar uchun bayram tadbirlarida ishtirok etish, yoshlar bilan Vatan haqida suhbat qurish, ular qal­bida milliy iftixor chirogʻini yoqish eng katta sharaf va saodatdir. Zero, shoir ayt­ganidek, “bu kunlarga yetganlar bor, yetma­ganlar bor”.

Yurtimiz mustaqillikka erishgan kun­lar umrimning ellik yoshdan oshgan davri­ga toʻgʻri keldi. Oʻsha tarixi ulugʻ, taqdiriy pallada menda bittagina orzu bor edi: taʼ­lim-tarbiya tizimi va davlat idoralarida orttirgan bilim, tajriba va hayotiy saboq­larimni yosh, mustaqil Vatanim ravnaqi yoʻ­lida sarflash.

Vaqt oʻtdi, yillar oldinga siljidi, le­kin bu orzu hech qachon soʻnmadi. Mana, hozir 85 yoshga toʻlsam-da, hanuz el xizmatidaman. “Nuroniy” jamgʻarmasi va mahalla hayoti­da jamoatchilik yoʻnalishida faol ishtirok etib kelyapman. Yurt ravnaqi, xalq manfaati yoʻlidagi har bir qadamimdan, har bir ezgu saʼy-harakatimdan ruhiy quvonch va maʼna­viy qanoat topaman.

Men uchun eng katta baxt bugungi kunda Va­tanimda kechayotgan ulkan siyosiy, ijtimoiy va iqtisodiy islohotlarga, hayotimning shu yoshida ham qurbim yetganicha hissa qoʻshib, bu jarayonning bevosita ishtirokchisi boʻlib qo­lishdir.

Oxirgi yillarda yurtimizdagi islohot­lar surʼati va koʻlamini baholash uchun qiyos topish mushkul. Prezidentimiz davlat rah­barligi masʼuliyatini oʻz zimmasiga olgan ilk kunlaridanoq barcha sohalarda ulkan yan­gilanishlar jarayonini boshlab yubordi. Bu oʻzgarishlar, avvalo, xalqimizni yillar da­vomida qiynab kelgan ogʻriqli muammolarni bartaraf etishdan boshlandi.

Misol uchun, keksalar hayotidagi qator adolatsiz va qiyinchilik keltiruvchi ho­latlar oʻtmishda qoldi. Ilgari pensiyalar oʻz vaqtida toʻlanmas, toʻlansa ham plastik kartalardagi mablagʻni naqdlashtirish katta mashaqqatga aylanar edi. Nuroniylar meh­nat qilishda davom etsa, pensiyaning toʻliq miqdorini olish huquqidan mahrum boʻlar­di.

Shuningdek, kundalik hayotimiz uchun za­rur boʻlgan gaz, suv, elektr taʼminoti, yoʻl­lar holati va mahalla infratuzilmasidagi koʻplab nosozliklar aholini qiynar, odam­lar fikrida “bu masalalar yechilmaydi” de­gan beixtiyor ishonchsizlik hukm surardi. Bugun esa ana shu muammolarga tizimli yechim topilmoqda, xalqning kundalik hayotidagi qulayliklar ortib, kelajakka ishonch yanada mustahkamlanmoqda.

Butun xalqimiz taqdiriga daxldor boʻlgan ishsizlik, kambagʻallik kabi ogʻir muammo­larga yechim topilishiga bir paytlar umidi­miz ham soʻnib borayotgandek tuyular edi. Ana shunday vaziyatda davlatimiz rahbari “Xal­qimiz olis kelajakda emas, bugun baxtli yashashga haqli” degan ulugʻ maqsadni ilgari surdi. Bu gʻoya inson qadrini barcha narsadan ustun qoʻygan, hayotning har bir jabhasini qamrab olgan islohotlar jarayonini boshlab berdi.

Natijada bugungi kunda ilgari, aso­san, xomashyo yetkazib beradigan oʻlka sifa­tida tanilgan yurtimiz endi sanoati izchil rivojlanayotgan, iqtisodiy qudrati yil sayin ortib borayotgan davlatga aylanmoq­da. Yurtimiz qiyofasi yangilanib, shahar va qishloqlarimiz obod va fayzli maskanlarga aylanmoqda. Mahallalarimizdagi zamonaviy infratuzilma, obod yoʻllar, koʻkalamzor bogʻ­lar xalqimiz hayotiga yangi ruh, yangicha kay­fiyat olib kirmoqda.

Eng quvonarlisi, yoshlarimiz uchun taʼlim olish, yaxshi kasb-hunar egallash, zamonaviy sharoitlarda ishlab, toʻkis va farovon hayot kechirish imkoniyatlari tobora kengaymoqda. Bu faqat statistik raqamlarda emas, balki kundalik hayotimizda yaqqol namoyon boʻlayot­gan voqelik. Men bunga oʻz farzandlarim va nabiralarim misolida, qolaversa, mahalla va tumanimiz yoshlari hayotida koʻp bora guvoh boʻlib kelyapman.

Dilbandlarimizning baxtli qiyofasi, or­zulari roʻyobga chiqqaniga shohid boʻlish biz, keksalar uchun beqiyos baxt va iftixordir. Bu qalbimizga quvonch, hayotimizga maʼno, umri­mizga umr qoʻshadi. Ertangi kunga ishonch va umidimiz yanada mustahkamlanadi.

Albatta, bunday fayzli, obod va baxtli kunlarga yetganimiz uchun har qancha shukrona aytsak arziydi.

Bugungi kunda keksalarga eʼtibor faqat moddiy yordam yoki imtiyozlar bilan cheklanib qolmayapti. Asosiysi, ularning jamiyatdagi oʻrni va qadri yanada yuksalmoqda. Nuroniy­larimiz davlat va jamiyat hayotida faol ish­tirok etishi, oʻz tajribasini yoshlar bilan oʻrtoqlashishi uchun keng imkoniyatlar yara­tilmoqda. Bu orqali nafaqat yoshlar tarbiya­sida, balki maʼnaviy muhitda ham ijobiy oʻzgarishlar roʻy bermoqda.

Shuningdek, urush va mehnat faxriylari­ning qadrini ulugʻlash, xotirasini abadiy­lashtirish maqsadida turli madaniy-maʼ­rifiy tadbirlar oʻtkazilmoqda. Sayohatlar, ziyoratlar, sport va madaniyat muassasalari­dagi bepul xizmatlar — bularning barchasi keksalarimizga “siz bizga keraksiz, siz biz uchun azizsiz” degan ulkan maʼnoni ifoda­laydi.

Ayniqsa, “Hech kim mehr va eʼtibor­dan chetda qolmasin” shiori ostida amalga oshirilayotgan ishlar nafaqat yolgʻiz keksalar, balki butun jamiyatda insoniylik va ham­jihatlik ruhini mustahkamlamoqda. Chunki keksalarga ehtirom bu oʻz oʻtmishingga, oʻz il­dizingga boʻlgan ehtiromdir.

Mustaqilligimizning 34 yillik bayra­mi arafasida biz, nuroniylar Vatanimizda kechayotgan oʻzgarishlardan faxrlanamiz va yoshlarimizga shuni tilardik: bugungi tinch va farovon hayotni, erkinlik va mustaqil­lik neʼmatini himoya qiling, unga munosib boʻling, uning yanada gullab-yashnashini taʼ­minlang. Chunki kelajak sizning qoʻlingizda, yurtimizning ertangi taqdiri sizning maʼ­naviy barkamolligingiz va Vatanga sadoqa­tingizda.

Shukrona bilan aytamizki, bugungi kun­da Vatan tuygʻusi, millat iftixori va bir­damlik ruhi har bir yurtdoshimiz qalbida yanada yogʻdulanmoqda. Biz, nuroniylar ana shu ezgu yoʻlda doimo duo va amal bilan yoshlari­mizga yelkadosh boʻlamiz.

Ayni vaqtda kechayotgan yangi bosqichdagi keng koʻlamli islohotlar va yangi Oʻzbekis­tonni barpo etishdek tarixiy jarayonlarda ishtirok etish barcha vatandoshlarimiz uchun ulkan sharaf va iftixordir. Biz, yoshi ulugʻ nuroniylar bunday ulugʻ maqsad yoʻlida faol ishtirok etishdan mamnunmiz. Preziden­timiz oʻz nutqlarida yosh avlodni barkamol, bilimli va el-yurt uchun fidoyi insonlar qilib tarbiyalashda nuroniylar tajribasiga suyanishini koʻp bora taʼkidlagan. Bu soʻzlar barcha nuroniylar qalbiga kuch-quvvat, ishonch va ragʻbat bagʻishlaydi.

Shu ezgu maqsad yoʻlida biz hayotiy taj­ribamiz, bilim va salohiyatimizni yoshlar tarbiyasiga yoʻnaltirib kelyapmiz. “Bir nu­roniy — oʻn yoshga masʼul” hamda “Nuroniy har bir oilaga masʼul” kabi loyihalar shu yoʻnalishdagi ishlarimiz samarasidir. Bu tashabbuslar nuroniylar uchun yoshlar hayoti­ga yaqindan kirib borish, ularning maʼnaviy olamini boyitish va yuksak insoniy fazilat­larini mustahkamlash imkonini yaratmoqda. Shu bilan birga, ular qalbida Vatanga mu­habbat va sadoqat tuygʻusini kuchaytirishga xizmat qilmoqda.

Koʻplab yoshi ulugʻlar qatorida men ham ushbu loyihalarda faol ishtirok etib kelyapman. Oʻzimga biriktirilgan yoshlar bilan suhbatlar jarayonida, avvalo, ularning hayo­tiy maqsadlari, orzu-intilishlari va kela­jak rejalarini diqqat bilan tinglayman. Shu asosda ularga toʻgʻri yoʻl topish, toʻsiq­larni yengib oʻtish va jamiyatda munosib oʻrin egallashda maslahat va amaliy yordam berish­ga harakat qilaman.

Bu yoʻlda qator davlat va nodavlat tashki­lotlar biz bilan hamkorlikda ishlayotgani muhim ahamiyatga ega. Ularning koʻmagi tu­fayli yoshlar bilan ishlash samarasi ortyap­ti, koʻplab ijobiy natijalar qoʻlga kiritil­moqda.

Ayniqsa, “Bir nuroniy — oʻn yoshga masʼ­ul” loyihasi amaliy samara bermoqda. U nafaqat yoshlar kamolotiga xizmat qilmoqda, balki ikki avlod oʻrtasidagi mehr-oqibat rishtalarini mustahkamlashda ham muhim oʻrin tutmoqda. Shu bilan birga, nuroniylar­ning jamiyatimizda kechayotgan islohotlarda faol ishtirokini taʼminlash, oilalarda ahillik va totuvlikni saqlash, tinchlik va osoyishtalik muhitini mustahkamlashga kat­ta hissa qoʻshmoqda.

Eng asosiysi, loyiha yoshlar qalbida milliy qadriyatlarimizga hurmat, Vatanga muhabbat va sadoqat tuygʻusini chuqur singdi­rishda samarali vositaga aylandi. Biz, nuro­niylar bu yoʻlda bor bilim va tajribamizni ayamaymiz, chunki bugungi yoshlar ertangi kun­ning masʼuliyatli vakili, yurtimiz taqdiri egalari hisoblanadi.

Oʻz navbatida, ertangi yorugʻ kelajagimiz yoʻlida fidoyilik va tashabbuskorlik bilan ishlayotgan nuroniylarni qoʻllab-quvvatlash, ularning umriga umr qoʻshish va boy hayotiy tajribasidan yoshlar kamolotida keng foy­dalanish doimiy eʼtiborda turibdi. Shu maqsadda nuroniylarning ijtimoiy faol­ligini ragʻbatlantirish yoʻlida qator amaliy choralar koʻrildi. Jumladan, “Faxriy murab­biy” ordeni va “Mehnat faxriysi” koʻkrak nishoni taʼsis etildi, shuningdek, tuman va shaharlarda “Nuroniylar maskani” majmua­lari tashkil qilindi.

Bu tashabbuslar nafaqat keksalarga muno­sib eʼzoz, balki jamiyat maʼnaviy muhitini boyitishda ham muhim ahamiyat kasb etmoqda. Zero, katta tajribaga ega nuroniylar, uzoq yillar turli sohalarda samarali mehnat qilgan obroʻ-eʼtiborli faxriylar salohiyati yoshlar tarbiyasida beqiyos manbadir. Ularning hayotiy saboqlari va maʼnaviy boyligini yosh avlodga yetkazish orqali jamiyatimizdagi maʼnaviy-maʼrifiy ishlar samaradorligi oshadi, yoshlarni faollikka undaydi, qalbida Vatan tuygʻusini yuksaltiradi.

Shu bilan birga, tarixdan toʻgʻri xulosa chiqarib, yorugʻ kelajakka intilish hissini kuchaytirishga zamin yaratiladi. Bu esa mus­taqil, taraqqiyparvar va maʼnaviy yetuk av­lodni shakllantirish yoʻlidagi muhim omil­lardan biridir.

Ayniqsa, bugungi murakkab globallashuv jarayonlari kechayotgan davrda bu masalalar tobora dolzarb ahamiyat kasb etmoqda. Bebaho boyligimiz boʻlgan tinchligimizni asrab- avaylash, odamlarimiz, ayniqsa, yosh avlodni bugungi tinchlik va osoyishtalik qadriga yetishga oʻrgatish, yot gʻoya va mafkuralar taʼ­siridan asrash, vatanparvarlik ruhida tar­biyalash, ona yurtga mehr va sadoqat tuygʻusini kuchaytirish “Nuroniy” jamgʻarmasi atrofi­da birlashgan biz, keksa avlod vakillarining muqaddas burchidir.

Shuningdek, ijtimoiy-maʼnaviy muhit­ni sogʻlomlashtirish, diniy qadriyatlardan yoshlar tarbiyasida unumli foydalanish, ja­miyatda jinoyatchilik va diniy mutaassiblik­ning oldini olish maqsadida “Jaholatga qarshi maʼrifat” gʻoyasi asosida turli maʼ­rifiy tadbirlar oʻtkazilmoqda.

Sport sohasida ham yoshlar tarbiyasiga xizmat qiladigan ishlar qilinyapti. Res­publika va xalqaro maydonlarda gʻolib­likni qoʻlga kiritgan faxriy chempionlar, sportchi-polvonlar ishtirokida mahalla­larda “Unutilmas chempionlar” va “Faxriy polvonlar” mavzularida uchrashuvlar uyush­tirilmoqda. Bu tadbirlar yoshlar qalbida gʻayrat, iroda va maqsad sari intilish tuy­gʻusini uygʻotmoqda.

Kasb-hunarga ega boʻlmagan yoshlar bilan bir qatorda sport, fan va boshqa sohalarda yuqori natijalarga erishgan, shuningdek, oʻzini oʻzi ish bilan taʼminlagan nogiron­ligi boʻlgan shaxslar hamda paralimpiya musobaqalari sovrindorlari ishtirokida “Matonat va jasorat” maʼnaviy-maʼrifiy tadbirlari oʻtkazilmoqda.

Bunday uchrashuvlar yoshlarning hayotga in­tilishini kuchaytiradi, ularni bilim olish, kasb-hunar egallash va hayot yoʻlida dadil qa­damlar tashlashga ruhlantiradi. Bu har bir yosh kamolotida muhim turtki vazifasini oʻtaydi.

Ana shunday ezgu ishlarga faol hissa qoʻshayotgan nuroniylar mehnatini munosib ragʻbatlantirish doimiy eʼtiborda turibdi. Xususan, “Bir nuroniy — oʻn yoshga masʼul” tamoyili asosida samarali faoliyat yuri­tayotgan va yoshlar hayotida ijobiy natijalar­ga erishgan nuroniylar “Nuroniy” jamgʻar­masi mablagʻlari hisobidan ragʻbatlantirib kelinmoqda. Bu, oʻz navbatida, nuroniylar­ning jamiyat hayotida yanada faol boʻlishiga va yoshlar bilan ishlashda yangi tashabbuslarni ilgari surishiga xizmat qilmoqda.

Bu kabi eʼtibor va ragʻbat biz, faxriylar­ni, shubhasiz, yanada faol boʻlishga undaydi. Men ham doimo harakat va izlanishdaman. Amaliy ishlarim qatorida oʻz tajribam va hayotdan olgan saboqlarimni yoshlarga keng­roq yetkazish, farzandlarimizning yurtimiz yaqin tarixiga oid bilimlarini boyitish maqsadida soʻnggi yillarda bir necha kitob yozdim. Ularni homiylar koʻmagida nashr etib, tumanimizdagi turli madaniy-maʼri­fiy muassasalarga tarqatdim.

Maqsadim shuki, oʻgʻil-qizlarimiz ona Vatan tarixi va ota-bobolarining ezgu orzu-umidlari haqida chuqurroq bilim va tushunchaga ega boʻlsin. Ishonchim komilki, bu ularning oʻzligini chuqur anglashi, ul­kan yaratuvchilik va bunyodkorlik ishlariga kamarbasta boʻlishiga muhim turtki boʻla­di.

Hayot davom etar ekan, ana shunday ezgu umidlar bilan yoʻgʻrilgan harakatlardan toʻx­tamaymiz. Biz, nuroniylarga bildirilayot­gan yuksak ishonch va eʼtiborga javoban boy hayotiy va kasbiy tajribamiz bilan yurtimiz obodligi, farovonligi va gullab-yashnashi yoʻlida kuch-gʻayratimizni ayamaymiz.

Mustaqilligimizning 34 yili davomida amalga oshirilgan ulkan islohotlar, erishil­gan tarixiy natijalar va yangicha fikr tarzi xalqimizning hayot darajasi, tafakkuri va kelajakka ishonchini mutlaqo yangi pogʻonaga koʻtardi. Ayniqsa, Prezidentimizning xalq bilan ochiq muloqotga tayangan, inson qad­rini barcha narsadan ustun qoʻygan, har bir qaror va tashabbusida milliy manfaatlar va xalq farovonligini ustuvor bilgan davlat­chilik siyosati samarasi yurtimiz hayotining barcha jabhasida namoyon boʻlmoqda.

Nuroniylarga yuksak eʼtibor, keksalar­ning boy hayotiy tajribasini yoshlar tarbiya­sida qoʻllashga boʻlgan ishonch va ragʻbat biz, keksa avlod vakillari uchun katta iftixor­dir. Prezidentimiz ilgari surgan “Xal­qimiz bugun baxtli yashashga haqli” degan ulugʻ gʻoyani amalga oshirishda har birimiz oʻzimizning maʼnaviy burchimiz va javobgar­ligimizni toʻliq his etamiz.

Biz, nuroniylar xalqimizning birdamli­gi, yurtimiz tinchligi va farovonligi yoʻ­lida doimo faol boʻlamiz. Chunki yangi Oʻz­bekiston qurilishi barchamizning umumiy saʼy-harakatimiz va kelajak avlodlar oldi­dagi eng katta merosimizdir. Shu yoʻlda biz oʻz hayotiy tajribamiz, maʼnaviy quvvatimiz va Vatanga muhabbatimizni ayamay, yanada yuk­sak marralarga erishishga intilamiz.

Obid AHMEDOV,

Chilonzor tumani nuroniylar

jamoatchilik kengashi raisi oʻrinbosari