Rasmiylar oʻlimga paratsetamol asosidagi sirop tarkibida aniqlangan ikki xavfli tarkibiy qism: etilen glikol va dietilen glikol sabab boʻlganini maʼlum qildi.

Indoneziyada bolalarning preparat qabul qilishi ortidan oʻlgani sababli yigirma beshta oila hozirda sogʻliqni saqlash va moliya vazirliklari, mamlakatning dori vositalarini tartibga soluvchi organi va kamida sakkizta farmatsevtika kompaniyasini sudga bergan. Bu oilalardan biri suddan 3,4 milliard rupiya (224 570 dollar) miqdorida tovon puli talab qilmoqda.

Jakartadagi sudda qatnashayotgan 36 yoshli Solihaning aytishicha, uning 3 yoshli qiziga siropni isteʼmol qilganidan keyin oʻtkir buyrak shikastlanishi tashxisi qoʻyilgan va bir necha kundan keyin vafot etgan. Ayol hukumatning javobgarlikka tortilishini istashini bildirgan.

“Agar qizim dorini isteʼmol qilmaganida, balki yonimda boʻlarmidi. Umid qilamanki, preparat uchun javobgar boʻlgan barcha masʼullar siropdan vafot etgan va hali ham kasal boʻlgan bolalar uchun javobgardir”, — deydi u.

Moliya vazirligi va daʼvo arizasida koʻrsatilgan beshta farmatsevtika kompaniyasi vakillari holat yuzasidan izoh berishdan bosh tortgan. Reuters nashri yana uchta kompaniya bilan bogʻlana olmagan.

Indoneziya hukumati bir qator yoʻtal siroplari isteʼmolini taqiqlab qoʻygan va xavfli tarkibiy qismlar borligi aytilgan bir qancha farmatsevtika kompaniyalariga qarshi sudga daʼvo arizasi bergan.