Ushbu yoʻnalishdagi siyosatga hamohang ravishda “Agrobank” ATBda ham aholi hamda mijozlarning moliya muassasasiga boʻlgan ishonchini yanada mustahkamlash, murojaatlarida aks etgan asosli masalalarni ijobiy hal etishga strategik yoʻnalishlaridan biri sifatida qaralmoqda. Bank boshqaruvi yigʻilishlarida bu boradagi ishlar doimiy eʼtibordagi masala sifatida muntazam muhokama etilyapti.
Murojaatlarning aksariyati bevosita moliya muassasasi faoliyati, mijozlarga xizmat koʻrsatish jarayonlari bilan bogʻliq. Yaʼni joriy yilda kelib tushgan murojaatlarning 38 foizi kredit yuzasidan, qolgani koʻrsatilayotgan boshqa xizmatlarga tegishli boʻldi.
Murojaatlar oʻtgan yildagiga nisbatan sezilarli kamaydi. Yaʼni oʻtgan yilning birinchi dekabrigacha 9 ming 870 ta murojaat qilingan boʻlsa, joriy yilning shu vaqtiga kelib mazkur raqam 9 ming 462 tani tashkil etdi. 69 foiz murojaatga ijobiy yechim topilib, qanoatlantirildi, qolganlariga esa meʼyoriy hujjatlar asosida tushuntirish berildi. Buning oʻziga xos asoslari bor, albatta. Masalan, 1216 qisqa raqamli mijozlar bilan aloqa markazi tashkil etilgani va uning kechki soat 24-00 gacha faoliyat yuritayotgani samaradorlikni taʼminlamoqda. Aloqa markazi orqali mijozlarni qiziqtirgan barcha savollarga javob berilmoqda, yangi bank xizmatlari va ular boʻyicha muhim maʼlumotlar taqdim etilmoqda. Aynan markaz orqali yil boshidan buyon jami 972 ming 328 ta qoʻngʻiroq, shuningdek, onlayn chat va telegram bot orqali jami 110 ming 230 ta murojaat qabul qilinib, soʻrovlarga batafsil javob berildi.
Shuningdek, joriy yilda aholi va bank mijozlari bilan yuzma-yuz muloqot qilish maqsadida hududlarda tadbirkorlar bilan 281 ta sayyor uchrashuv oʻtkazildi. Ularda ishtirok etgan 3 617 fuqarodan ham 3 080 ta murojaat boʻldi. Ularning 1 467 tasi joyida ijobiy hal qilindi, 1 613 ta murojaat boʻyicha amaldagi meʼyoriy hujjatlar asosida tushuntirishlar berilib, ijrosi nazoratga olindi.
Taʼkidlash kerakki, murojaatlarni oʻz vaqtida va batafsil koʻrib chiqilishida kamchiliklarga yoʻl qoʻygani uchun bankning 92 xodimiga nisbatan intizomiy chora koʻrildi.
Murojaatlar tahlili natijasida bank mijozlariga xizmat koʻrsatish sifati oshirildi, ular uchun qulay boʻlgan yangi bank xizmat turlari joriy etildi. Bundan tashqari, kredit ajratish jarayoni soddashlashtirilib, ortiqcha boʻgʻinlar qisqartirildi.
Anʼanaviy xizmatlarda inson omilini kamaytirish orqali qulaylikni oshirish bilan birga, xizmat boʻyicha yuzaga kelishi mumkin boʻlgan shikoyatlarning ham oldini olish maqsadida bank mobil ilovasi takomillashtirildi. Avtomatik karta emissiyasini amalga oshiruvchi kartomat qurilmalari, naqd pul topshiruvchi YATT va yuridik shaxslarga avtomatlashtirilgan depozit mashina (ADM) - onlayn inkassatsiya qiluvchi qurilmalar amaliyotga joriy etildi.
Shu bilan birga, barcha filiallarda “Smart-office” shoxobchalari qurilib, bosqichma-bosqich ishga tushirilmoqda. Mazkur shoxobchalar ham inson omilisiz 24/7 rejimida faoliyat yuritadi hamda barcha turdagi bank operatsiyalarini avtomatlashtirilgan holda bajaradi.
“Jismoniy va yuridik shaxslarning murojaatlari toʻgʻrisida”gi qonunga muvofiq, bankning bosh ofisida jismoniy va yuridik shaxslarni kutib olish, shaxsiy qabullarni tashkil etish hamda murojaatlar bilan ishlash boʻyicha maxsus hududlar, xonalar faoliyati yoʻlga qoʻyilgan. Bu yerda jismoniy va yuridik shaxslar, imkoniyati cheklanganlar, umuman, barcha uchun zarur qulaylik yaratilgan. Bular bank tomonidan murojaatlar boʻyicha bajarilayotgan ishlar natijadorligining ayrim jihatlari. Muhimi, “Agrobank” ATBda bu yoʻnalish doimiy eʼtibor va nazoratga olingan. Tahlil va natija bank jamoasi faoliyatida oʻz aksini topmoqda.
Azizjon AHMADALIYEV,
“Agrobank” ATB bank apparati direktori oʻrinbosari
