“8 Subh” nashri xabariga ko'ra, otishma Tojikistonning Shamsiddin Shoxin tumani va Afg'onistonning Badaxshon viloyatining Shahri-Buzurg tumani o'rtasida joylashgan Dovang qishlog'ida sodir bo'lgan.
Dastlabki ma'lumotlarga ko'ra, mojaro ikki mamlakat o'rtasidagi tabiiy chegara bo'lib xizmat qiluvchi Panj (Amudaryo) daryosi oqimining o'zgarishi tufayli yuzaga kelgan. Bu masala ilgari ikki tomon o'rtasida nizolarga sabab bo'lgan.
OAV xabarlariga ko'ra, hodisa xorijiy kompaniyalar, jumladan, Xitoy kompaniyalari faoliyat yuritadigan oltin qazib olish hududida sodir bo'lgan.
Manbalarning ta'kidlashicha, otishma qurbonlarga sabab bo'lgan, ammo halok bo'lganlar va jarohatlanganlarning aniq soni hali aniqlanmagan. Qaysi tomonda odamlar qurbon bo'lgani noma'lum.
Jurnalistlarning Tojikiston chegara qo'shinlaridan javob olishga urinishlari muvaffaqiyatsiz yakunlandi.
Tolibon harakati ham hali rasmiy bayonot bermadi. “8 Subh” xabariga ko'ra, otishmadan so'ng, harakat vakillari chegaradagi vaziyatni muhokama qilish uchun Badaxshonning yangi hokimi Ismoil G'aznaviy bilan uchrashuv o'tkazishdi.
Shaxri-Buzurg tumani ilgari Tolibon kuchlari va tojik chegarachilari o'rtasida qurolli hodisalar sodir bo'lgan joy bo'lgan.
Avvalroq, harakat vakili Zabihulla Mujohid Afg'oniston va Tojikiston o'rtasidagi chegara “xavfsiz va to'liq nazorat ostida” ekanligini aytgan edi.
“Ikkala tomon ham xavfsizlik uchun javobgar va biz o'z majburiyatlarimizni bajaryapmiz”, deb ta'kidladi u.
Hodisa Balx viloyati gubernatori Yusuf Vafo boshchiligidagi Tolibon delegatsiyasi Dushanbega tashrif buyurganidan bir necha kun o'tgach sodir bo'ldi.
U Tojikiston Milliy xavfsizlik davlat qo'mitasi raisi Saymo'min Yatimov va Ulamolar kengashi rahbari Saidmukarram Abdulqodirzoda bilan uchrashuvlar o'tkazdi.
Tojikiston Markaziy Osiyoda Tolibon bilan to'g'ridan-to'g'ri aloqalar yo'qligini rasman e'lon qilgan yagona davlat bo'lib qolmoqda. Dushanbe Qobul rasmiylarini inklyuziv hukumat tuzishga va inson huquqlarini hurmat qilishga chaqirmoqda.
Tojikiston va Afg'oniston o'rtasidagi siyosiy pozitsiyalarga qaramay, savdo-iqtisodiy aloqalar va gumanitar hamkorlik davom etmoqda. Dushanbedagi Afg'oniston elchixonasiga avvalgi hukumat tomonidan tayinlangan diplomat, Xorug'dagi konsullikka esa hozirgi Qobul hokimiyati vakili rahbarlik qilmoqda.
Tojikiston elchixonasi va konsulligi Afg'onistonda faoliyatini davom ettirmoqda, deb xabar berdi asiaplustj.info.
