Kinematografiya agentligi buyurtmasiga binoan “Oʻzbekfilm” kinokonserni DUK tomonidan “Osmondagi bolalar-3” badiiy filmi suratga olinadi. Film ssenariy muallifi va rejissyori Zulfiqor Musoqov.
“Osmondagi bolalar-3” toʻliq metrajli badiiy filmi avvalgi qismlarini takrorlamasdan oʻzgacha talqinda suratga olinadi. Unda “Osmondagi bolalar 1,2” filmlaridagi qadrdon qahramonlar Xurshid, Javohir, Hamdam va Baxtiyorlarning otalik maqomiga erishgani va farzandlari bilan munosabatlari aks etadi.
Zulfiqor Musoqov mashhur “Osmondagi bolalar” filmining yangi talqini haqida gapirdi:
— Menga telefon va ijtimoiy tarmoqlar orqali “qachon “Osmondagi bolalar” filmini navbatdagi qismi chiqadi? Bizga qahramonlarning taqdiri qanday boʻlgani juda qiziq” degan murojaatlar tez-tez boʻlib turadi. Bundan bilinadiki, tomoshabin ularni oʻzlari bilan bir hayotda yashayotgandek qabul qilgan. Shundan soʻng, “Osmondagi bolalar-3” filmini ssenariysini yozdim. Uni Kinematografiya agentligi Badiiy kengashiga taqdim qildim. Kengash film ssenariysini ijobiy baholadi. Hozirda ijodiy guruh bilan mazkur kinofilm ustida ish boshlaganmiz.
Qahramonlar oʻsha-oʻsha. Aktyorlarga taklifimni aytganimda, ular bajonidil rozi boʻldi. Filmda Xurshid koʻzga koʻringan jarroh, Hamdam taniqli ssenarist, Javohir sport murabbiyi boʻlib yetishadi. Baxtiyor esa otasining izidan borib, biznes bilan shugʻullanadi.
Maʼlumot uchun: Oʻzbekiston sanʼat arbobi, kinorejissyor Zulfiqor Musoqov “Abdullajon”, “Bomba”, “Kichkina tabib”, “Osmondagi bolalar 1, 2”, “Vatan”, “Xazonrezgi”, “Qoʻrgʻoshin”, “Novda”, “Qovun”, “Dadam betob”, “Berlin-Oqqoʻrgʻon”, “Hayrat” kabi filmlarni suratga olgan.
Kinematografiya agentligi Axborot xizmati
