“Dunyo” AAning xabar berishicha, rasmiy tadbirdan soʻng oʻtkazilgan muloqot chogʻida Oʻzbekiston hamda Finlyandiya oʻrtasidagi ikki tomonlama hamkorlikning bugungi holati va istiqbollari muhokama qilindi.

Prezident Aleksandr Stubb Oʻzbekiston Prezidenti Shavkat Mirziyoyev rahbarligida yurtimizda amalga oshirilayotgan keng koʻlamli islohotlarni fin tomoni toʻliq qoʻllab-quvvatlashini va ushbu yoʻnalishda ikki tomonlama hamkorlikni kengaytirishga tayyorligini bildirdi.

Finlyandiya yetakchisi, shuningdek, rasmiy Xelsinki va Toshkent oʻrtasidagi siyosiy muloqot hamda ikki tomonlama savdo-iqtisodiy hamkorlikning rivojlanib borayotganini yuqori baholab, Oʻzbekistonning mintaqadagi muhim oʻrnini qayd etdi va mamlakatimiz bilan siyosiy-iqtisodiy aloqalarni yanada rivojlantirishdan manfaatdorligini tasdiqladi.