Unda yetakchi xorijiy investitsiya kompaniyalari, diplomatik missiyalar, vazirlik va idoralar rahbarlari, xalqaro moliya institutlari (XMI)ning jami 150 nafardan ko‘proq vakillari ishtirok etdi.
Tadbir doirasida O‘zbekistonda investitsiya faoliyatini amalga oshirishning amaliy jihatlari muhokama etildi hamda XIK Ishchi guruhining mamlakatimizda faoliyat yuritayotgan yetakchi investorlar bilan o‘tkazgan uchrashuvlarida bildirilgan masala va takliflar ko‘rib chiqildi. Shuningdek, jahon bozorlarida ro‘y berayotgan investitsiyaviy tendensiyalar va asosiy yo‘nalishlar muhokama etildi hamda O‘zbekistonning ishbilarmonlik muhitni yaxshilash borasidagi kompleks sa’y-harakatlariga baho berildi.
Tadbir davomida O‘zbekiston Respublikasi investitsiyalar, sanoat va savdo vaziri Laziz Kudratov, yeTTBning O‘zbekistondagi vakolatxonasi rahbari Alkis Drakinos, Xalqaro moliya korporatsiyasi (IFC), PwC Uzbekistan vakillari va boshqa spikerlar so‘zga chiqdilar.
Laziz Kudratov o‘zining qutlov so‘zida O‘zbekiston investitsiya muhitini izchil yaxshilash, tizimli tahlil natijalari asosida investorlar uchun yangi imtiyoz va preferensiyalarni joriy etish, ularni manzilli qo‘llab-quvvatlash chora-tadbirlarini kuchaytirish, jamiyatda investor va tadbirkorlarning manfaatlari yuqori darajada hurmat qilinadigan o‘zaro munosabatlar madaniyatini shakllantirishga qat’iy intilayotganini ta’kidladi. Ko‘pgina rivojlanayotgan mamlakatlarda investitsiyalar defitsiti ortib borayotgan bir vaqtda O‘zbekistonda olib borilayotgan islohotlarning ahamiyati, investitsiyaviy muhiti va ilg‘or savdo siyosati mamlakatimizning istiqbolli sarmoyadorlar uchun jozibador yo‘nalish sifatidagi maqomini yanada oshirdi.
Shu bilan birga, ishtirokchilar e’tibori O‘zbekistonning investitsiya qonunchiligini qayta ko‘rib chiqish, xususiylashtirish jarayonlarini faollashtirish, davlat-xususiy sheriklikni rag‘batlantirish va yashil iqtisodiyot tashabbuslarini rag‘batlantirish borasidagi faol sa’y-harakatlariga qaratildi.
Shuningdek, Jahon savdo tashkilotiga (JST) a’zo bo‘lish bo‘yicha ishlar faollashgani va bu ham jahon standartlari va xalqaro hamkorlik etikasiga sodiqlikning ramzi ekanligi qayd etildi. O‘zbekiston tashqi siyosatining ochiqligi, savdo imtiyozlarining faol joriy etilayotgani uning diversifikatsiyalashgan va barqaror iqtisodiy konsepsiyani hayotga tatbiq etayotgan mamlakat sifatida tan olinishiga hissa qo‘shyapti.
Sessiya davomida «Investitsiyalar to‘g‘risida»gi qonunning amaliy jihatlari, soliq ma’murchiligidagi ijobiy yangiliklar, investorlar bilan ishlash bo‘yicha «Yagona elektron darcha» platformasini joriy etish masalalari muhokama etildi hamda «Toshkent» xalqaro moliya markazi loyihasi taqdim etildi.
Tadbir yakunida O‘zbekistonda investitsiya muhitini yaxshilash bo‘yicha tizimli takliflarni o‘z ichiga olgan Investorlar kengashining Oraliq majlisi Bayonnomasi imzolandi. Bundan tashqari, milliy qonunchilikni takomillashtirishda texnik va maslahat yordamini ko‘rsatishga qaratilgan Xalqaro moliya korporatsiyasi bilan hamkorlik to‘g‘risidagi Bitim qabul qilindi, deb xabar beradi Investitsiyalar, sanoat va savdo vazirligi matbuot xizmati.
