Dastlab Mudofaa vazirligida faxriy qorovul ishtirokida mehmonlarni rasmiy kutib olish tadbiri bo‘lib o‘tdi. Harbiy orkestr tomonidan ikki davlat madhiyasi ijro etildi. Shundan so‘ng qardosh xalq harbiy delegatsiyasi sharafiga Mudofaa vazirligida qabul uyushtirilib, muzokaralar davom ettirildi.
Muzokaralarda Bahodir Qurbonov va Xulusi Akar O‘zbekiston hamda Turkiya davlatlarini bir-biri bilan chambarchas bog‘lab turuvchi jihatlarga alohida to‘xtalib o‘tdi. Dini, tili, tarixiy urf-odatlari bir bu ikki xalqning do‘stona munosabatlari bundan keyin ham yana-da mustahkamlanib borishiga ishonch bildirildi.
Mudofaa vazirlari davlat rahbarlarining oliy darajadagi tashriflari davomida erishilgan natijalarga, shuningdek, harbiy sohada ikki tomonlama hamkorlikning bugungi holati va istiqbollariga alohida eʼtibor qaratdi.
Tadbir yakunida ikki davlat Mudofaa vazirligi rahbarlari O‘zbekiston bilan Turkiya o‘rtasida harbiy va harbiy-texnik hamkorlikni rivojlantirish haqida bitim imzoladi.