O‘zbekiston va Yaponiya universitetlari rektorlarining navbatdagi forumini o‘tkazish rejalashtirilmoqda

Ta'lim 27 fev 2022, 09:21 2 278

Yaponiya oliy o‘quv yurtlari bilan ilmiy va taʼlim sohasidagi aloqalarni yana-da kengaytirish maqsadida O‘zbekistonning Yaponiyadagi elchixonasi va Sukuba universiteti o‘rtasida ikki mamlakat universitetlari rektorlarining 4-forumini tashkil etish masalalarini muhokama qilish maqsadida videoaloqa yig‘ilishi bo‘lib o‘tdi, deb xabar bermoqda “Dunyo” AA muxbiri.

Uchrashuvda Sukuba universiteti vitse-prezidenti Oneda Osamu, professorlar Usuyama Tosinobu, Temur Dadaboyev, Ono Masaki va maʼmuriy boshqaruv xodimlari qatnashdi.

Forumni o‘tkazish bilan bog‘liq tashkiliy-texnik, konseptual va boshqa masalalar muhokama qilindi. Jumladan, anjuman dasturiga O‘zbekiston va Yaponiya oliy o‘quv yurtlari rektorlari ishtirokida Rektorlar forumi, O‘zbekiston va Yaponiya tadqiqotchilarining ilmiy forumi, O‘zbekiston va Yaponiya talabalari ishtirokida Akademik forum va O‘zbekiston madaniyat haftaligi kabi qator tadbirlarni kiritish rejalashtirilmoqda.

Uchrashuv yakunida o‘zaro hamkorlikning turli yo‘nalishlarini muhokama qilish bo‘yicha muntazam ravishda uchrashuvlar tashkil etish bo‘yicha kelishuvga erishildi.