Amaldagi qonunchilikka koʻra, nodavlat taʼlim tashkilotlari oliy taʼlim faoliyati bilan shugʻullanishlari uchun Vazirlar Mahkamasi huzuridagi Taʼlim sifatini nazorat qilish davlat inspeksiyasidan litsenziya olishlari lozim.
Yangi oʻquv yili oldidan abituriyentlar va ularning ota-onalariga qulaylik yaratish va ishonchli maʼlumot taqdim etish maqsadida Taʼlim sifatini nazorat qilish davlat inspeksiyasidan litsenziya olgan nodavlat oliygohlar roʻyxati eʼlon qilinmoqda.
Toshkent shahridagi Singapur menejmentni rivojlantirish instituti
Toshkent shahridagi Turin politexnika universiteti
Toshkent shahridagi Inxa universiteti
Toshkent shahridagi Yodju texnika instituti
Toshkent shahridagi Amiti universiteti
Toshkent shahridagi Vebster universitetining taʼlim dasturlarini amalga oshirish markazi
Akfa universiteti
Qoʻqon universiteti
Fargʻona shahridagi Koreya xalqaro universiteti
TEAM universiteti
Toshkent shahridagi Britaniya menejment universiteti
“Tashkent International University of Education” xalqaro universiteti
Turkiyaning Iqtisodiyot va texnologiyalar universitetining Toshkent shahridagi filiali
“EUROPEAN MEDICAL” universiteti
“STARS INTERNATIONAL” universiteti
Maʼmun nomidagi jahon tillari instituti
“AL-BUKHARI” universiteti
“CAMBRIDGE INTERNATIONAL” universiteti
“TMC” instituti
Taʼkidlash lozim, nodavlat oliy taʼlim tashkilotlari hujjatlarni qabul qilish muddati va talabalarni oʻqishga qabul qilish tartibini mustaqil belgilaydi.
Shu bilan birga, Oʻzbekiston Respublikasi Prezidentining 2021-yil 22-iyundagi “2021/2022 oʻquv yilida Oʻzbekiston Respublikasining oliy taʼlim muassasalariga oʻqishga qabul qilishning davlat buyurtmasi parametrlari toʻgʻrisida”gi qaroriga muvofiq, mamlakatimizda faoliyat yuritayotgan nodavlat oliy taʼlim tashkilotlaridan talabalar oʻqishini davlat oliy taʼlim muassasalarining mos va turdosh boʻlmagan taʼlim yoʻnalishlariga koʻchirish talabadan alohida iqtidor talab etiladigan taʼlim yoʻnalishlari boʻyicha kasbiy (ijodiy) imtihonlar, boshqa taʼlim yoʻnalishlari boʻyicha test sinovlari asosida oʻtkaziladi.
Oʻtish balidan past ball toʻplagan talabalar bakalavriatga qabul qilishdagi tartibga muvofiq tabaqalashtirilgan toʻlov-kontrakt asosida oʻqishga qabul qilinadi.
Oʻzbekiston Respublikasi davlat oliy taʼlim muassasalarining mos va turdosh boʻlmagan taʼlim yoʻnalishlariga koʻchirish oʻrnatilgan tartibda, tegishli bakalavriat taʼlim yoʻnalishi uchun belgilangan tabaqalashtirilgan toʻlov-kontraktning minimal miqdoriga teng boʻlgan bir martalik toʻlov asosida amalga oshiriladi, deyiladi inspeksiya axborot xizmati xabarida.
