Pandemiya bilan bog‘liq vaziyat sababli turkmanistonlik shaxmatchilar Toshkentga yetib kelisholmadi.
Eslatib o‘tamiz, umumiy sovrin jamg‘armasi 3 000 AQSH dollarini tashkil etuvchi ushbu musobaqada dastlabki ikkita o‘rinni egallagan shaxmatchilar Jahon kubogida qatnashish huquqini qo‘lga kiritishadi.

Kecha bo‘lib o‘tgan 5-tur o‘yinlari hamyurtlarimizga omadli chiqdi. Jumladan, musobaqada reytingi eng yuqori bo‘lgan shaxmatchimiz Nodirbek Abdusattorov garchi qora donalarda o‘ynagan bo‘lishiga qaramay qozog‘istonlik Jondos Agmanov ustidan g‘alaba qozondi va o‘z ochkolari sonini 4taga yetkazib oldi.

Ikki hamyurtimiz – Jahongir va Shamsiddin Vohidovlar qarama-qarshiligida esa kuchlar teng keldi: 0,5-0,5.

Musobaqaning ikkinchi tartib raqamli ishtirokchisi Nodirbek Yoqubboyev ham 5-turda g‘alaba nashidasini surdi. U oq donalarda yana bir qozog‘istonlik shaxmatchi, grossmeyster Murtaz Kazgaleyevni mag‘lub etdi.

5-tur o‘yinlaridan keyin Shamsiddin Vohidov 4,5 ochko bilan yakka peshqadam bo‘lib oldi. Biryo‘la uch nafar shaxmatchimiz – Jahongir Vohidov, Nodirbek Yoqubboyev hamda Nodirbek Abdusattorovlar esa bir xil – 4 ochkodan jamg‘arishgan.