Prezidentimizning yoshlar bilan navbatdagi ochiq muloqotida bildirilgan fikr va tashabbuslar, ayniqsa, taʼlim sifati, innovatsiya, raqamli texnologiyalar, tadbirkorlik va vatanparvarlik ruhini yuksaltirish borasidagi vazifalar biz, oliy taʼlim muassasalari jamoasi uchun dasturilamal boʻlib xizmat qiladi.
Astoydil harakat qilgan odam, albatta, koʻzlagan manziliga yetadi. Yoshlar bilan uchrashuv natijalarimizni sarhisob qilish va yangi reja-maqsadlarni belgilab olishimizga asos boʻldi.
Mamlakatimizning yoshlarga oid siyosati, ertani oʻylab koʻrilayotgan izchil chora-tadbirlar bugun samarasini bermoqda. Yoshlarimiz koʻrsatilgan gʻamxoʻrlik, imkoniyat va imtiyozlardan ruhlanib, oʻziga ishonchi ortyapti. Bugun yangilikka intiluvchan, bilimli, tashabbuskor yoshlarning yangi avlodi maydonga chiqqan. Shunga mos ravishda universitetimizda ham keng koʻlamli ishlar amalga oshirilyapti. Xususan, “Kelajakka qadam” dasturi orqali 166 talabaning tadbirkorlik faoliyatini qoʻllab-quvvatlash maqsadida banklardan 6 milliard 405 million soʻm miqdorida kredit ajratildi. Bank imtiyozlari tadbirkorlikka qiziqadigan yoshlarning oʻz biznesini yoʻlga qoʻyishi yoki oilaviy tadbirkorlikni rivojlantirishida asosiy koʻmakchiga aylandi.
Talabalarimiz muntazam ravishda “Mirzo Ulugʻbek vorislari” va boshqa tanlovlarda gʻoliblar safidan oʻrin egallab kelmoqda. Joriy oʻquv yilining oʻzida 13 talabamiz Oʻzbekiston Prezidenti va boshqa nomdor stipendiyalar sohibi boʻldi.
Xalqaro hamkorlik borasida ham ishlarimiz koʻlami kengaymoqda. Hozir 2 ta qoʻshma taʼlim dasturi boʻyicha faoliyat yurityapmiz. 350 talabamiz “Ishla va sayohat qil (Work and travel)” dasturi asosida Germaniya va Bolgariyada pul toʻlanadigan amaliyot jarayonlarida ishtirok etish uchun hujjat topshirgan. Ayni paytda 1000 dan ortiq talaba nemis tili kurslarida til oʻrganmoqda. Shuningdek, 15 talaba grantlar asosida Yevropa Ittifoqining nufuzli universitetlariga stajirovka oʻtash, qisqa va uzoq muddatli taʼlim dasturlari asosida tahsil olish uchun yuboriladi.
2025/2026 oʻquv yilida universitetni 5408 bitiruvchi tamomlaydi. Ularning barchasini ish bilan taʼminlash chorasi koʻrilmoqda. Universitetimizga biriktirilgan 10 dan ortiq korxona va tashkilot bilan hamkorlikda dual taʼlim yoʻlga qoʻyilmoqda. Talabalarni yangi bilim va hunarlarga oʻrgatish maqsadida Sunʼiy intellekt, Bioenergetika, Kimyoviy texnologiya ilmiy-tadqiqot laboratoriyalari hamda “Energo Control Lab” energiya audit markazi, Seysmologiya va qurilish ilmiy-tadqiqot institutini tashkil etishni maqsad qilganmiz.
Muhandis talabalarimiz xorijda oson ish topishi uchun, avvalo, ularga zamonga mos taʼlim berish, shuningdek, asosiy taʼlim yoʻnalishlarini xalqaro akkreditatsiyadan oʻtkazish lozim. Bugungi kungacha universitetimizning 3 ta magistratura mutaxassisligi va 2 ta bakalavriat taʼlim yoʻnalishi Germaniyaning ASIIN xalqaro akkreditatsiya tashkilotida roʻyxatdan oʻtkazildi. Bu nima beradi?
Ertaga talabaga diplomga qoʻshib, xalqaro akkreditatsiya sertifikatini ham beramiz. Demak, bitiruvchining qoʻlida universitet diplomi, muhandislikka oid xalqaro sertifikat, til bilish boʻyicha yana bir sertifikati boʻlsa, u ishsiz qolmaydi. Nafaqat Oʻzbekistonda, balki chet elda ham oʻziga munosib, serdaromad ishni oson topa oladi.
Bugungi kunda har bir universitet faoliyatini baholashda talabalar bandligini taʼminlashdagi koʻrsatkichiga alohida eʼtibor qaratiladi. Bu — katta masʼuliyat. Sababi, oliygohni tamomlayotgan talaba nafaqat bilimli mutaxassis, balki hunarli boʻlishi ham lozim. Ana shunda uning ertaga ishli boʻlishi oson kechadi. Bilimi, hunari bormi, ishsiz qolmaydi.
Universitetimizning qurilish va arxitektura taʼlim yoʻnalishida tahsil oladigan talabalaridan 776 nafari viloyatdagi 99 ta mahallaning bosh rejasini ishlab chiqishga jalb etildi. Ularning amaliy mashgʻulotlari ham ana shu hududlarda tashkil qilinmoqda. Bu bilan mahorati yuksalib, tajribasi ortadi. Yangi gʻoyalar, loyihalar uchun zamin yaratiladi.
Kitobxonlikni kuchaytirish maqsadida universitetimizda “Bir oyda bir kitob”, “Asardan iqtibos” kabi tanlovlar yoʻlga qoʻyildi. Professor-oʻqituvchilarimiz tomonidan mahallalardagi yoshlarga kitoblar sovgʻa qilindi. Maʼnaviyat hamisha ustuvor masala hisoblanadi, chunki mutaxassisning bilimi, hunari, diplomi boʻlsa-yu, maʼnaviyati boʻlmasa, u yetuk kadr emas. Insonning, birinchi navbatda, maʼnaviyati shakllangan boʻlishi lozim. Yuqorida taʼkidlaganimizdek, badiiy asarlar bilan bogʻliq tanlovlar talabalarimizni kitobga oshno qildi.
Prezidentimizning yoshlar bilan muloqotida talabalarning sport sohasidagi iqtidorini aniqlash, ularni xalqaro musobaqalarga tayyorlash, malakali murabbiylar qoʻl ostida shugʻullanishini taʼminlash masalasida ham muhim tashabbuslar ilgari surildi. Shu maqsadda sport federatsiyalari bilan amaliy hamkorlik oʻrnatilmoqda. Shaxmat boʻyicha viloyat chempioni va bir necha turnirlar gʻolibasi Feruza Qurbonovaning xalqaro musobaqalarda ishtirok etishiga yordam koʻrsatiladi.
Shu oʻrinda yoshlarga aytar soʻzimiz bor: bilim olishga masʼuliyat bilan yondashing. Har bir dars, har bir laboratoriya mashgʻuloti, har bir amaliy topshiriq kelajagingiz uchun poydevordir. Innovatsion fikrlashni rivojlantiring. Startap loyihalar, ilmiy tadqiqotlar va amaliy ishlanmalarda faol ishtirok eting. Til oʻrganish va raqamli koʻnikmalarni oshirib boring. Bular xalqaro maydonda raqobat qila olish uchun talab emas, balki zaruratdir.
Hozir universitetimizda 22 mingga yaqin talaba tahsil olmoqda. Iqtidorli yoshlarimiz tomonidan 60 dan ortiq startap loyiha yaratilib, ulardan 10 ga yaqini amaliyotga tavsiya qilindi. Ushbu startaplar, asosan, mahallalar va hududiy korxonalardagi muammolar yechimiga qaratilayotgani bilan ahamiyatli.
Talaba yoshlarning innovatsion loyihalari va tashabbuslarini qoʻllab-quvvatlash maqsadida universitetimizda zamonaviy ekotizim yaratiladi. Yaʼni Muhandislik ilmiy-ishlab chiqarish markazi (Fab-lab) ishga tushirilmoqda. Markaz ularni 10 dan ortiq kasbga oʻrgatish, 150 dan ortiq yoshning bandligini taʼminlash, startaplarning “gʻoyadan mahsulotgacha” tamoyilini amalga oshirishga xizmat qiladi.
Davlatimiz rahbari tomonidan bildirilgan ishonch katta sharaf va ulkan masʼuliyatdir. Bu ishonchni amaliy natijalar, yangi yutuqlar va yuksak marralar bilan oqlashga harakat qilamiz. Aminmanki, universitetimiz talabalari nafaqat Qashqadaryo viloyati, balki butun mamlakatimiz taraqqiyotiga munosib hissa qoʻshadigan yetuk mutaxassis boʻlib yetishadi.
Sherzod NEʼMATOV,
Qarshi davlat texnika universiteti rektori
