Президентимизнинг ёшлар билан навбатдаги очиқ мулоқотида билдирилган фикр ва ташаббуслар, айниқса, таълим сифати, инновация, рақамли технологиялар, тадбиркорлик ва ватанпарварлик руҳини юксалтириш борасидаги вазифалар биз, олий таълим муассасалари жамоаси учун дастуриламал бўлиб хизмат қилади.

Астойдил ҳаракат қилган одам, албатта, кўзлаган манзилига етади. Ёшлар билан учрашув натижала­римизни сарҳисоб қилиш ва янги режа-мақсадларни белгилаб олишимизга асос бўлди.

Мамлакатимизнинг ёшларга оид сиёсати, эртани ўйлаб кўрилаётган изчил чора-тадбирлар бугун са­марасини бермоқда. Ёшларимиз кўрсатилган ғамхўр­лик, имконият ва имтиёзлардан руҳланиб, ўзига ишончи ортяпти. Бугун янгиликка интилувчан, би­лимли, ташаббускор ёшларнинг янги авлоди майдон­га чиққан. Шунга мос равишда университетимизда ҳам кенг кўламли ишлар амалга ошириляпти. Хусу­сан, “Келажакка қадам” дастури орқали 166 талаба­нинг тадбиркорлик фаолиятини қўллаб-қувватлаш мақсадида банклардан 6 миллиард 405 миллион сўм миқдорида кредит ажратилди. Банк имтиёзлари тад­биркорликка қизиқадиган ёшларнинг ўз бизнесини йўлга қўйиши ёки оилавий тадбиркорликни ривож­лантиришида асосий кўмакчига айланди.

Талабаларимиз мунтазам равишда “Мирзо Улуғ­бек ворислари” ва бошқа танловларда ғолиблар са­фидан ўрин эгаллаб келмоқда. Жорий ўқув йилининг ўзида 13 талабамиз Ўзбекистон Президенти ва бошқа номдор стипендиялар соҳиби бўлди.

Халқаро ҳамкорлик борасида ҳам ишларимиз кў­лами кенгаймоқда. Ҳозир 2 та қўшма таълим дастури бўйича фаолият юритяпмиз. 350 талабамиз “Ишла ва саёҳат қил (Work and travel)” дастури асосида Герма­ния ва Болгарияда пул тўланадиган амалиёт жараён­ларида иштирок этиш учун ҳужжат топширган. Айни пайтда 1000 дан ортиқ талаба немис тили курслари­да тил ўрганмоқда. Шунингдек, 15 талаба грантлар асосида Европа Иттифоқининг нуфузли универси­тетларига стажировка ўташ, қисқа ва узоқ муддатли таълим дастурлари асосида таҳсил олиш учун юбо­рилади.

2025/2026 ўқув йилида университетни 5408 би­тирувчи тамомлайди. Уларнинг барчасини иш билан таъминлаш чораси кўрилмоқда. Университетимизга бириктирилган 10 дан ортиқ корхона ва ташкилот билан ҳамкорликда дуал таълим йўлга қўйилмоқда. Талабаларни янги билим ва ҳунарларга ўргатиш мақ­садида Сунъий интеллект, Биоэнергетика, Кимёвий технология илмий-тадқиқот лабораториялари ҳамда “Energo Control Lab” энергия аудит маркази, Сейсмо­логия ва қурилиш илмий-тадқиқот институтини таш­кил этишни мақсад қилганмиз.

Муҳандис талабаларимиз хорижда осон иш топи­ши учун, аввало, уларга замонга мос таълим бериш, шунингдек, асосий таълим йўналишларини халқаро аккредитациядан ўтказиш лозим. Бугунги кунгача университетимизнинг 3 та магистратура мутахассис­лиги ва 2 та бакалавриат таълим йўналиши Герма­ниянинг ASIIN халқаро аккредитация ташкилотида рўйхатдан ўтказилди. Бу нима беради?

Эртага талабага дипломга қўшиб, халқаро аккре­дитация сертификатини ҳам берамиз. Демак, бити­рувчининг қўлида университет дипломи, муҳандис­ликка оид халқаро сертификат, тил билиш бўйича яна бир сертификати бўлса, у ишсиз қолмайди. Нафақат Ўзбекистонда, балки чет элда ҳам ўзига муносиб, сердаромад ишни осон топа олади.

Бугунги кунда ҳар бир университет фаолиятини баҳолашда талабалар бандлигини таъминлашдаги кўрсаткичига алоҳида эътибор қаратилади. Бу — катта масъулият. Сабаби, олийгоҳни тамомлаётган талаба нафақат билимли мутахассис, балки ҳунарли бўлиши ҳам лозим. Ана шунда унинг эртага ишли бўлиши осон кечади. Билими, ҳунари борми, ишсиз қолмайди.

Университетимизнинг қурилиш ва архитектура таълим йўналишида таҳсил оладиган талабаларидан 776 нафари вилоятдаги 99 та маҳалланинг бош режа­сини ишлаб чиқишга жалб этилди. Уларнинг амалий машғулотлари ҳам ана шу ҳудудларда ташкил қилин­моқда. Бу билан маҳорати юксалиб, тажрибаси орта­ди. Янги ғоялар, лойиҳалар учун замин яратилади.

Китобхонликни кучайтириш мақсадида уни­верситетимизда “Бир ойда бир китоб”, “Асардан иқтибос” каби танловлар йўлга қўйилди. Профес­сор-ўқитувчиларимиз томонидан маҳаллалардаги ёшларга китоблар совға қилинди. Маънавият ҳами­ша устувор масала ҳисобланади, чунки мутахассис­нинг билими, ҳунари, дипломи бўлса-ю, маънавия­ти бўлмаса, у етук кадр эмас. Инсоннинг, биринчи навбатда, маънавияти шаклланган бўлиши лозим. Юқорида таъкидлаганимиздек, бадиий асарлар би­лан боғлиқ танловлар талабаларимизни китобга ошно қилди.

Президентимизнинг ёшлар билан мулоқотида та­лабаларнинг спорт соҳасидаги иқтидорини аниқлаш, уларни халқаро мусобақаларга тайёрлаш, малакали мураббийлар қўл остида шуғулланишини таъмин­лаш масаласида ҳам муҳим ташаббуслар илгари сурилди. Шу мақсадда спорт федерациялари билан амалий ҳамкорлик ўрнатилмоқда. Шахмат бўйича вилоят чемпиони ва бир неча турнирлар ғолибаси Феруза Қурбонованинг халқаро мусобақаларда иш­тирок этишига ёрдам кўрсатилади.

Шу ўринда ёшларга айтар сўзимиз бор: билим олишга масъулият билан ёндашинг. Ҳар бир дарс, ҳар бир лаборатория машғулоти, ҳар бир амалий топшириқ келажагингиз учун пойдевордир. Инно­вацион фикрлашни ривожлантиринг. Стартап лойи­ҳалар, илмий тадқиқотлар ва амалий ишланмаларда фаол иштирок этинг. Тил ўрганиш ва рақамли кў­никмаларни ошириб боринг. Булар халқаро майдон­да рақобат қила олиш учун талаб эмас, балки зару­ратдир.

Ҳозир университетимизда 22 мингга яқин тала­ба таҳсил олмоқда. Иқтидорли ёшларимиз томони­дан 60 дан ортиқ стартап лойиҳа яратилиб, улардан 10 га яқини амалиётга тавсия қилинди. Ушбу стар­таплар, асосан, маҳаллалар ва ҳудудий корхона­лардаги муаммолар ечимига қаратилаётгани билан аҳамиятли.

Талаба ёшларнинг инновацион лойиҳалари ва ташаббусларини қўллаб-қувватлаш мақсадида уни­верситетимизда замонавий экотизим яратилади. Яъни Муҳандислик илмий-ишлаб чиқариш марка­зи (Fab-lab) ишга туширилмоқда. Марказ уларни 10 дан ортиқ касбга ўргатиш, 150 дан ортиқ ёшнинг бандлигини таъминлаш, стартапларнинг “ғоядан маҳсулотгача” тамойилини амалга оширишга хиз­мат қилади.

Давлатимиз раҳбари томонидан билдирилган ишонч катта шараф ва улкан масъулиятдир. Бу ишончни амалий натижалар, янги ютуқлар ва юксак марралар билан оқлашга ҳаракат қиламиз. Аминман­ки, университетимиз талабалари нафақат Қашқадарё вилояти, балки бутун мамлакатимиз тараққиётига муносиб ҳисса қўшадиган етук мутахассис бўлиб етишади.

Шерзод НЕЪМАТОВ,

Қарши давлат техника университети ректори