Bu haqda Ekologiya, atrof-muhitni muhofaza qilish va iqlim oʻzgarishi vazirligi maʼlum qildi.
Qayd etilishicha, loyiha hududdagi eng dolzarb ekologik muammolardan biri — sanoat korxonalari va issiqxona xoʻjaliklaridan kelib chiqadigan ifloslovchi moddalar chiqarish darajasining yuqoriligini hal etishga qaratilgan.
Hujjat atmosferaga salbiy taʼsirni kamaytirish va korxonalarning ekologik jihatdan toza texnologiyalarga bosqichma-bosqich oʻtishini taʼminlashga qaratilgan kompleks choralar tizimini koʻzda tutadi.
Xususan, quyidagi chora-tadbirlar rejalashtirilgan:
- Hududdagi sanoat korxonalari va issiqxonalarda chang va gaz tozalash uskunalarini oʻrnatish;
- Issiqxonalarda mavjud qozonlarni, ularning amaldagi talablarga javob bermasligini hisobga olib, zamonaviy energiya samarador va ekologik toza tizimlar bilan almashtirish;
- Issiqxona va sanoat obyektlarini koʻmirni ishlatmasdan boshqa alternativ energiya manbalariga oʻtkazish;
- Korxonalarga ishlab chiqarishni modernizatsiya qilish, tashlamalarni tozalash tizimlarini, mahalliy tozalash inshootlarini, avtomatik havo monitoringi stansiyalarini oʻrnatish uchun moliyaviy ragʻbatlar taqdim etish, shu jumladan, grant mexanizmlari yordamida.
Ushbu chora-tadbirlarni amalga oshirish ifloslantiruvchi moddalar chiqarilishini sezilarli darajada kamaytirishga, ekologik xavfsizlikni oshirishga hamda Toshkent shahri va Toshkent viloyati aholisi uchun yanada qulay yashash sharoitlarini yaratishga yordam beradi. Shuningdek, ekologik talablarni kuchaytirish mamlakatning iqlim barqarorligi va “yashil” iqtisodiyotga oʻtish strategiyasining muhim qismidir.
