Uning taʼkidlashicha, bunday binolarni qurish osonroq, arzonroq va tezroq, chunki barcha qavatlar unifikatsiya qilingan va zavodda yigʻiladi. Bu yuqori sifat, energiya samaradorligi va minimal foydalanish xarajatlarini taʼminlaydi. Dinamik binolarga ega noodatiy loyiha tez orada Amerikaning yirik shaharlaridan birida amalga oshiriladi va bir vaqtning oʻzida bunday loyiha Oʻzbekistonda ham boshlanish ehtimoli mavjud. Loyiha xarajatlarning 85 foizigacha qoplanadigan Italiya eksport krediti orqali moliyalashtirilishi rejalashtirilgan.
Filipp Dessoy oʻz nutqida mintaqada qurilish sifati bosqichma-bosqich yaxshilanib borayotgani, ammo maqbul darajaga erishish uchun hali katta yoʻl bosib oʻtish kerakligini taʼkidladi. "Birinchi martadanoq sifatli qurilmasa, kelajakda qayta qurish va xarajatlar boʻlishi muqarrar. Bu tejash emas, balki kechiktirilgan zarar", — deya urgʻu berdi. Shuningdek, u xavfsizlik, ayniqsa, koʻp qavatli binolarni qurishda muhimligini taʼkidlab, Oʻzbekistonda yosh va salohiyatli mehnat resurslari mavjudligini professionallikni oshirish va yangi standartlarni joriy etish uchun asos sifatida ijobiy baholadi.
Vladimir Ivanov kelajakdagi megapolislar faqat investorlar uchungina emas, balki eng avvalo odamlar uchun yaratilishi kerakligini alohida taʼkidladi. U yosh avlodning istaklari bilan tanishtirar ekan, Yangi Toshkent aholisi — ayniqsa, Alfa avlodi butunlay boshqacha hayot tarziga intilishini taʼkidladi. Ular koʻproq tabiat, individual harakatchanlik, aqlli infratuzilma va kommunal xizmatlar uchun minimal xarajatlarni xohlashadi. “Ular (yoshlar) shunday deyishmoqda: «Arxitekturadan koʻzlarim va hissiyotlarim bilan zavqlanaman. Uni borib koʻraman, ammo oʻzim uchun ixcham, kichik xonadon sotib olaman. Menga koʻp kvadrat metr kerak emas, ularga pul sarflamoqchi emasman. Koʻchaga chiqqanimda, oʻsha yerda qulay boʻlishini xohlayman. Doʻstlarim bilan oʻynagani, sport bilan shugʻullangani joy boʻlishini xohlayman, rivojlanish uchun imkoniyat boʻlsin” va hokazo.Qizigʻi; biz, bizning avlod katta xonadonga ega boʻlishni xohlar edik va bu yoʻlda uzoq yurdik. Ammo ular boshqacha, biroz boshqacha hayot kechirishadi», — deya taʼkidladi Ivanov.
U shuningdek, aholi zichligi past boʻlgan sharoitda shahar infratuzilmasi qimmatga tushishini taʼkidlab, loyihachilarni makon, iqtisodiyot va barqarorlik oʻrtasidagi muvozanatni saqlashga chaqirdi. Shaharsozlikning eng muhim tamoyillari sifatida u raqamlashtirish, ekologik materiallardan foydalanish, tarix bilan bogʻliqlik va ESG masalalariga eʼtibor qaratishni koʻrsatib oʻtdi. “Toshkent allaqachon mamlakatning yalpi ichki mahsulotining 20 foizidan koʻprogʻini taʼminlamoqda. Yangi shahar rivojlanishi bilan bu ulush yanada ortadi — chunki aynan shu yerda qoʻshimcha qiymat yaratishni biladigan odamlar yashaydi va ishlaydi”, — deya xulosaladi u.
Sessiya Toshkent butun Markaziy Osiyoning asosiy oʻsish markazlaridan biriga aylanish salohiyatiga ega ekanligini taʼkidladi. Mintaqa rahbarlari allaqachon manfaatlarning oʻxshashligi va kuch-gʻayratlarni birlashtirish zarurligi haqida fikr bildirmoqdalar. Jahon miqyosidagi raqobat sharoitida isteʼdod, gʻoya va sarmoyani bir nuqtaga toʻplay olganlar gʻolib chiqadi. Yangi Toshkent — bu nafaqat zamonaviy shahar, balki investorlar, muhandislar, shaharshunos mutaxassislar va kelajak avlodlar uchun jozibador boʻladigan barqaror megapolis modelini yaratish imkoniyatidir.
