Juda yaxshi esimda. Yurt mustaqilligi bizga ozodlik, erkinlik, to‘kinlik olib keldi deb ishongan edik. Afsuski, bu quvonch uzoqqa cho‘zilmadi. Goh zanjirlangan eshiklar, goh qalin panjaralar bilan o‘ralgan chegaralar ichida qo‘rquv va hadik bilan yashay boshladik. Oramizda yana sho‘ro zamonidagi bir-birining qadamini poylash, og‘zini hidlash illatlari bolalab ketdi. “Oq” va “qora” ro‘yxatlar paydo bo‘lishi bilan qatag‘on davrini eslatadigan og‘ir kunlar boshlandi.

O‘zbekiston xalq shoiri Usmon Azim “Yangi O‘zbekiston” gazetasida chop etilgan “Riyosiz so‘zlar” maqolasida jasorat va vijdon amri bilan yozganidek: “U-bu joylarda bo‘lgan o‘zgarishlar odamlarning dasturxoniga yetib kelmadi. Mamlakatni firibgarlar bosdi. Bu illatlarga qarshi kurashishi zarur bo‘lgan tashkilotlar esa davlat ichida davlat tuzdilar. Odamlar ustidan zo‘ravonlik joriy etildi. Masalan, Surxondaryoda xavfsizlik xizmati allaqanday fashistik (boshqa so‘z ularning qilmishini ifodalab berolmaydi) tizim o‘rnatdi. Odamlarni pashsha o‘rnida ko‘rmadilar. Xo‘rladilar, mulklarini tortib oldilar, misli ko‘rilmagan qiynoqlarga soldilar, o‘ldirib ham yubordilar. Qiynoqlarning Stalin zamonida kechgan usullarini qo‘lladilar va ularni yanada yangi “pog‘ona”larga ko‘tardilar”.

Maqolada ro‘y-rost yozilgan bu og‘ir va qora kunlarning ortda qolgani chin bo‘lsin. Eslayversang, yuraging ezilib, qalbing titrab ketadi.

Xalqimizda “Oyning o‘n beshi qorong‘i, o‘n beshi yorug‘” degan hikmat bor. Endi “Riyosiz so‘zlar” maqolasidagi “Odamlar odamga o‘xshab yashashni o‘rganyapti!” degan jumlaga e’tibor qarataylik. Bu so‘zlarni shoir mustaqilligimizning 35 yilligi arafasida yozayapti.

Muallif o‘zi qo‘ygan savolga o‘zi bunday javob beradi: “Butun mamlakatda bunday yoppa bunyodkorlikni qaysi qudrat harakatga keltiryapti? Bu savolga javob aniq: Shavkat Miromonovich Mirziyoyev!”. Haqiqatan, Prezidentimiz fidoyi va jasur islohotchi sifatida xalqimizni ulug‘ maqsadlar sari ruhlantirdi. Bugun ana shu islohotlar barcha sohada o‘zini yorqin namoyon qilmoqda.

Ayni yangilanishlar tufayli xalqimiz hayotida va dunyoqarashida ma’naviy-ma’rifiy, ilmiy-amaliy uyg‘onish fasli boshlandi... Yangi g‘oyalar, yangi fikrlar tufayli islohotlar jarayoni izchillik bilan yuksak pog‘onalarga ko‘tarilib borayotir. Ona Vatan deb uyg‘onish — buyuk baxt! Vataning nurli kelajagi, taraqqiyoti uchun birlashish esa cheksiz g‘urur va quvonch!

“Uyg‘onish” shu qadar jozibador, mo‘tabar so‘zki, uni har qanchа yurakdan jo‘shib, jo‘r bo‘lib, qo‘lni qo‘lga berib, yelkani yelkaga tirab, g‘urur bilan baland ovozlarda hayqirib aytsak, yarashadi. “Uyg‘onish” so‘zini eshitsam yoki o‘qisam, buyuk shoirmiz Abdulla Oripovning “Uyg‘onish zamoning” she’ridagi ushbu quyma satrlar dilimdan tilimga ko‘chaveradi:

Oqqan daryolaring qaytadan oqsin,

Hali erimagan qorlaring bordir.

Sen san’at o‘lkasi, she’r diyorisan,

Qancha chertilmagan torlaring bordir.

Uyg‘onish zamoning muborak bo‘lsin,

Azaliy shiddating, orlaring bordir...

Vatanim, seni bir bor ko‘rganlar yana ko‘rgisi kelib, sog‘inib qolishi chin. Yana senga intilishi haqiqat. Sen dunyoni maftun etyapsan. Ulug‘ shoirmiz Erkin ­Vohidov ijodiy suhbatlardan birida faxr bilan bunday degan edi: “O‘zbekiston — haqiqiy jannatmonand yurt. Bu go‘zal zaminga, haqiqatan, Allohning nazari tushgan. Fasllarning tartib bilan aylanib kelishi betakror mo‘‘jizadir. Zaminning ne’matlarga boyligini, yetishtirilgan hosillarning hayratlanarli darajada mazali ekanini ta’riflab bo‘lmaydi. Inson uchun shunday ajoyib, betakror va tengsiz mo‘‘jizalarga boy mamlakatda yashashning o‘zi tengsiz baxtdir!”.

Agar ulug‘ shoirmiz hayot bo‘lganida, xalqimiz Vatanimiz mustaqilligining 35 yilligini ulkan yutuqlar bilan nishonlayotganini, tarixiy, madaniy va ma’rifiy yuksalishlar, milliy-ruhiy uyg‘onishlar bilan kutib olayotganini ko‘rib, benihoya sevingan bo‘lar edi.

Yaxshi eslaymiz: millat uyg‘onishining ilk sadolari 2016 yilda Shavkat Mirziyoyevning hali Prezidentlikka nomzodlik paytida saylovchilar bilan o‘tgan ilk uchrashuvlarida yangray boshlagan edi.

Davlatimiz rahbari faoliyatida katta jasorat bilan yangi O‘zbekistonni bunyod etish g‘oyasini dadil ilgari surdi. Bu ulug‘vor g‘oya tufayli hayotimizga yangi tafakkur, yangi shijoat, yangi turmush tarzi hamda ijodiy kuch-g‘ayrat shiddat bilan kirib kela boshladi. Birgina “yangi” so‘zining o‘zi odamlar ongida, hayotida o‘zgarishlar sodir bo‘lishiga turtki berdi. “Yangi” so‘zi mo‘‘jiza yanglig‘ porladi.

O‘zbekiston dunyoga yuz ochdi. Dunyo esa shunday bebaho va saxiy yurt, bagrikeng, samimiy va tinchliksevar xalq borligini qayta kashf etib, uning bag‘riga intilmoqda. Bu tabarruk tuproqni bir ko‘rib, tavof etishga mehr bilan o‘shiqmoqda.

Uyg‘onish faslining poydevori mustahkam, qadamleri dadil, qanotlari esa burgutnikiday shiddatlidir. U olis cho‘qqilarni zabt etishni niyat qilgan. Buyuk va ezgu niyatlaring hamisha yo‘ldoshing bo‘lsin, uyg‘onish burguti! Sening shiddatli qanotlaring xalqimizga hamisha ilhom va najot bag‘ishlasin!

Dunyoning taraqqiy etgan xalqlari tarixidan ma’lumki, millatning jahon sahnасida yorqin namoyon bo‘lishi dastlab tarixiy, ruhiy-ma’naviy uyg‘onish, milliy qadriyat va an’analarni anglash bilan boshlanadi. So‘ng taraqqiyot bilan hamqadam bo‘lgan ilmiy-amaliy uyg‘onish hamda yetuk tafakkur orqali ro‘yobga chiqadi.

Yangi O‘zbekiston aynan mana shunday nurli, porloq yo‘ldan dadil bormoqda. Ona Vatanimizning ko‘rkam va betakror tarixiy maskanlaridan biri — Islom ­tsivilizatsiyasi markazining bunyod etilishi millat qalbiga beqiyos ma’rifat hadya etdi.

Bugun Islom tsivilizatsiyasi markazi nafaqat O‘zbekiston yoki Markaziy Osiyoni, balki butun dunyoni o‘ziga maftun etayotgan betakror ma’naviy-ma’rifiy va tarixiy majmuaga aylandi. Markazga kelayotgan ziyoratchilar va sayyohlarning ko‘zlaridagi hayrat va hayajonni ko‘rib, qalbimizda g‘urur, iftixor uyg‘onadi.

Islom tsivilizatsiyasi markazi salohiyati bilan birga o‘zimiz ham kuchli millat bo‘lib uyg‘onyapmiz. Dunyo­ni ham uyg‘otyapmiz. Olam ahli ham bizni ангlayapti, tushunyapti, mehr va ishonch bilan intilyapti. Biz rivojlangan davlatlar bilan birga uyg‘onyapmiz, birga taraqqiy etyapmiz.

Yangi­dan barpo etilgan Imom Buxoriy majmuasi ham ma’naviy-ma’rifiy va diniy tafakkurimizning, islomiy dunyoqarashimizning uyg‘onishida bebaho ma’rifat maskaniga aylandi. Bu tabarruk qadamjoni ziyorat qilishga yurtdoshlarimiz va xorijlik mehmonlarning qadami uzilmayapti. Biz Imom Buxoriy ruhiyati bilan uyg‘onmoqdamiz.

Qaysi sohani olmang, har qadamda yangi islohotlar amalga oshayotganidan rozi bo‘lib yashayotgan, uyg‘onish lahzalaridan bahra olib, zavqu shavq, kuch-g‘ayratga to‘layotgan, yangi marralarni zabt etayotgan g‘ayratli, bilimdon yoshlarni ko‘rib, hayratlanasiz.

Sport sohasini olaylik. Masalan, biz ko‘proq Pele, Maradona singari jahon futboldi yulduzlariga ishqibozlik qilib kelganmiz. Hatto biz, ishqibozlar guruhlarga bo‘linib, o‘zaro bahslashganmiz.

Bugun esa bir haqiqatni tan olaylik: butun dunyo o‘zbekning jasur futbolchisi Abduqodir Husановga ishqibozlik qilib, uni jahon yulduziga tenglashtirayotganі g‘ururimizga g‘urur qo‘shmoqda. Biz bugun Abduqodir Husановdan faxrlanish ila uyg‘onmoqdamiz! Biz — dzyudo bo‘yicha jahon chempioni Diyora Keldiyorovaning jasorati bilan uyg‘onmoqdamiz! Boks bo‘yicha dunyo tan olgan mutlaq chempion Bahodir Jalolovning matonati bilan uyg‘onmoqdamiz! Xalqaro shaxmat federatsiyasining Nomzodlar turniri g‘olibi Javohir Sindorovning tafakkuri bilan uyg‘onmoqdamiz.

Hozirgi tarixiy islohotlar jarayonida minglab bilimdon, kitobxon hamda sohasining fidoyisi bo‘lgan, nurli kelajagimiz bunyod bo‘layotganiga astoydil ishongan halol-pok insonlarning hayrati va shijoati bilan uyg‘onmoqdamiz...

Bu uyg‘onishlarimizning bosh sababchisi Prezidentimiz ekanini faqat o‘zbek xalqi emas, balki dunyo ko‘rib, bilib turibdi.

Ilohim, yangi O‘zbekistonimizning uyg‘onish fasli gullab-yashnasin, boqiy bo‘lsin!

Xush kelibsan, Uyg‘onish fasli!

Ashurali JO‘RAYEV,

O‘zbekistonda xizmat ko‘rsatgan jurnalist