Tadbirda IHTga aʼzo davlatlar, jumladan, Pokiston, Eron, Turkiya, Ozarbayjon, Qozogʻiston, Qirgʻiziston, Tojikiston delegatsiyalari rahbarlari va yuqori martabali mehmonlar ishtirok etdilar.
“IHT doirasida turizmni rivojlantirishda birgalikda ishlashimiz uchun koʻplab imkoniyatlar mavjud. Turizm bizni yoʻnaltiruvchi maqsad, umumiy maqsadlar sari harakatlantiruvchi manba boʻlishi mumkin. Biz birgalikdagi saʼy-harakatlarimizni umum transchegaraviy tabiiy va madaniy merosimizni himoya qilish va targʻib etish, IHT boʻylab oʻzaro manfaatlarni birlashtirish yoʻlida diplomatik aloqalarni kuchaytirish va turizm infratuzilmalariga sarmoyalarni koʻpaytirish hamda bor imkoniyatlarni ishga solish va bir-birimiz bilan ilgʻor tajribalarni almashishda faollikni taklif qilamiz”- deb taʼkidladi Turizm qoʻmitasi raisi Umid Shadiyev.
Forum ishtirokchilari barqaror va inklyuziv turizmni rivojlantirish uchun qulay sharoitlar yaratishga qaratilgan qoʻshma saʼy-harakatlarni qoʻllab-quvvatlashlarini eʼlon qildilar.
Shuningdek, ekologik makonda ichki turizmni ragʻbatlantirish va oʻzaro turistik oqimlarni oshirish uchun aʼzo davlatlarning turizm salohiyatini oshirish boʻyicha oʻz fikrlarini bildirdilar.
“Men IHTga aʼzo davlatlar oʻrtasida turizmning iqtisodiy rivojlanish va mintaqaviy integratsiya uchun toʻliq salohiyatini ochish uchun doimiy hamkorlikka chaqiraman. Imkoniyatlarni aniqlash va muammolarni hal etishda birgalikda harakat qilaylik, xalqlarimiz va fuqarolarimiz porloq kelajagiga hissa qoʻshaylik. Birgalikda kuchli tomonlarimizni ishga solish orqali biz global turizm sohasidagi mavqeimizni oshirishimiz va madaniy almashinuvni rivojlantirishimiz mumkin”, — dedi IHT Bosh kotibi Husrav Noziri.
Forum yakunida IHTga aʼzo davlatlar kelishuvi bilan Oʻzbekiston hamda IHT tashabbuslari asosida Shahrisabz deklaratsiyasi qabul qilindi, deb xabar beradi Turizm qoʻmitasi matbuot xizmati.
