Bu haqda IIV matbuot xizmati xabar berdi.
Qayd etilishicha, 2007-yili Toshkent viloyatida tugʻilgan K.I. internet tarmogʻida ekstremistik gʻoyalar taʼsiriga tushib qoladi.
Buning oqibatida u oʻzining 16 nafar yaqin tanishi bilan noqonuniy “jamoat” boʻlib yigʻilib, kelgusida xorijda faoliyat olib borayotgan “Islom davlati” xalqaro terrorchilik tashkilotlari safiga qoʻshilishni rejalashtiradi.
Ularning niyati Oʻzbekiston Respublikasi IIV-DXX xodimlari tomonidan hamkorlikda olib borilgan tezkor surishtiruvlar davomida aniqlandi.
Mazkur holat yuzasidan Oʻzbekiston Respublikasi Jinoyat kodeksining 244-moddasi bilan jinoyat ishi qoʻzgʻatilgan.
“Loqaydlik va ishonuvchanlik oqibatida internet tarmogʻi orqali yot gʻoyalar taʼsiriga tushib qolmaslik uchun fuqarolarimizni doimo ogoh boʻlishiga chaqiramiz. Oʻzingizning taqdiringizga befarq boʻlmang”, deyiladi IIV xabarida.
