Bu haqda Innovatsion rivojlanish vazirligi xabar berdi. Xitoy-oʻzbek vaksinasining 3 faza klinik sinovlari natijalari 27-avgust kuni Xitoy fond bozorida eʼlon qilindi.
“Shtammlar genetikasi boʻyicha tadqiqotlar ZF-UZ-VAC2001 vaksinasi barcha shtammlar uchun umumiy 81,76 foiz, alfa («britancha”) shtammiga qarshi 92,93 foiz, delta (“hindcha”) shtammiga qarshi 77,54 foiz samaradorligini namoyish etdi», — deyiladi xabarda.
Maʼlumot uchun, Pfizer vaksinasining samaradorligi 85 foiz, AstraZeneca 68 foiz ekani, Moderna vaksinasi esa “birlamchi” shtamm (“uxancha”) uchun yuqori samaradorlikni koʻrsatib (94 foiz), delta shtamm uchun 76 foizgacha pastlagani ilmiy adabiyotlarda qayd etilgan.
Qayd etilishicha, mazkur tadqiqot, shuningdek, vaksinaga boʻlgan inson organizmining reaksiyasi vaksina va platsebo olganlarda farq qilmaganini koʻrsatgan. “Shunday qilib, klinik tadqiqotlar natijasi Xitoy-Oʻzbekiston hammuallifligida yaratilgan vaksina aholiga koronavirus yuqishining oldini olish va xavfsizlik jihatdan samarali ekanini tasdiqladi”, — deyiladi vazirlik bayonotida.
Vaksinaning III faza xalqaro koʻp markazli klinik tadqiqotlari 2020-yilning 10-dekabridan boshlangan boʻlib, 18 yoshdan katta boʻlgan jami 29 ming kishini qamrab oldi. Mazkur tadqiqotlar Xitoyning Xunan provinsiyasida, shuningdek, Oʻzbekiston, Indoneziya, Pokiston va Ekvador davlatlarida oʻtkazildi.
30-iyun sanasiga kelib jami 28,5 ming nafar koʻngilli roʻyxatdan oʻtkazilgan boʻlib, ulardan 14 249 nafari vaksina va 14 251 nafari platsebo olganligi qayd etilgan. Mazkur koʻngillilardan 647 nafarida kasallik aniqlangan, ulardan 221 nafarida kasallik 3 ta doza vaksina olgandan soʻng, 7 kundan keyin aniqlangan. JSST protokoliga koʻra, kamida 156 ta holatda kasallik aniqlansagina tadqiqot natijalari ochilishi mumkin.
Dastlabki statistik tahlil toʻliq vaksinatsiyadan 7 kun keyin kasallanganlarning 35 nafari vaksina bilan, 186 nafari platsebo bilan emlanganini koʻrsatgan. Bu vaksinaning 81,76 foiz samarali ekanini anglatadi. JSST talablariga koʻra, vaksina kamida 70 foiz samara berishi lozim. Shuningdek, ZF-UZ-VAC2001 vaksinasi bilan emlanganlar orasida kasallikning ogʻir shakli bilan ogʻriganlar yoki oʻlim holatlari qayd etilmagan.
“ZF-UZ-VAC2001 vaksinasining Oʻzbekistondagi klinik sinovlariga keladigan boʻlsak, klinik tadqiqotlar Zhifei Longcom Biopharmaceutical Co.Ltd kompaniyasining 8 nafar mutaxassisi, Innovatsion rivojlanish vazirligi huzuridagi Ilgʻor texnologiyalar markazining 30 nafar olimi, Sogʻliqni saqlash vazirligi huzuridagi Virusologiya ilmiy-tadqiqot instituti va boshqa tibbiyot muassasalarining 112 nafar tibbiyot xodimlari tomonidan oʻtkazildi”, — deya taʼkidlanadi xabarda.
Maʼlum qilinishicha, klinik tadqiqotlarda Oʻzbekistondan jami 6966 nafar koʻngilli ishtirok etgan boʻlib, ulardan 214 nafari 60 yoshdan kattalar. Tadqiqotlar davomida har bir koʻngilli ishtirokchi 28 kun oraligʻi bilan 3 ta dozada “vaksina/platsebo” sxemasida emlangan. Ulardan 13 kishida oʻrta darajadagi nojoʻya taʼsir aniqlangan boʻlib, bu 1 foizdan kam koʻrsatkichdir. Alohida ajratilgan guruhlarda 95 foiz holatlarda yetarli darajada antitanalar ishlab chiqarilgani aniqlangan.
«27-mart kunidan koʻngillilar orasida COVID-19 kasalligiga chalinganlar aniqlana boshladi. 232 nafar koʻngillida PZR test musbat natija koʻrsatgan boʻlsa, ulardan 52 nafar kishi kasallikning oʻrta shakli bilan ogʻridi. Musbat PZR testlar namunalari britancha shtamm mavjudligiga tekshirildi.
Mazkur tadqiqot shuningdek vaksinaga boʻlgan inson organizmining reaksiyasi vaksina va platsebo olganlarda farq qilmaganini koʻrsatdi. Shunday qilib, klinik tadqiqotlar natijasi Xitoy-Oʻzbekiston hammuallifligida yaratilgan ZF-UZ-VAC2001 vaksinasi aholiga koronavirus yuqishining oldini olish va xavfsizlik jihatdan samarali ekanini tasdiqladi», — deyiladi bayonotda.
