Xizmat koʻrsatish sohasining rivojlanishi iqtisodiy oʻsish, aholi, ayniqsa yoshlar bandligini taʼminlash va turmush farovonligini oshirishda katta ahamiyatga ega.
Prognozlashtirish va makroiqtisodiy tadqiqotlar instituti ekspertlari oʻtkazgan tahlil natijalariga koʻra, 2022-yil yakunlari boʻyicha Oʻzbekistonda xizmatlar sohasi YAIMning 41,5 foizini tashkil etdi va 2017-2022-yillarda sohaning real oʻsish koʻrsatkichi 1,9 marotaba oshdi.
Soʻnggi yillarda respublikada xizmat koʻrsatish sohasini qoʻllab-quvvatlash va jadal rivojlantirish borasida muhim qadamlar qoʻyildi. Xususan:
- “Elektron hukumat” tizimi takomillashtirildi va umumiy elektron davlat xizmatlari soni 368 taga yetdi (2019-yilda — 173 ta), ulardan 242 tasi tadbirkorlar uchun moʻljallangan;
- biznesni roʻyxatga olish osonlashtirildi va xizmatlar sohasidagi kichik tadbirkorlik subyektlari soni 2,2 barobar koʻpaydi (2017-yilda 128 mingta, 2022-yilda 325 mingta);
- AKT infratuzilmasi qariyb 6 barobar (optik tolali aloqa liniyalari uzunligi 2017-yildagi 20,3 ming kilometrdan 2022-yilda 118 ming kilometrga yetdi) va logistika tizimi 1,2 barobar yaxshilandi (tashilgan yuklar 2017-yildagi 1146,2 million tonnadan 2022-yilda 1398,9 million tonnaga yetdi).
Zamonaviy xizmatlarni rivojlantirishda sohaga xususiy sektorni jalb qilishning ragʻbatlantirilishi oʻz samarasini berdi va tahlil qilingan yillarda quyidagi oʻzgarishlar qayd etildi:
- moliya xizmatlari 5,1 marotaba oshdi. Xususiy va xorijiy banklarning sohaga jalb qilinishi ularning raqobatbardoshligini oshirdi va 2022-yilning 1-dekabr holatiga koʻra, HHI indeksi 1016 gacha pasaydi (2018-yilning 1-yanvar holatiga koʻra 1520 ga teng boʻlgan);
- axborot va aloqa sohasidagi xizmatlar 2,8 marotaba oshdi. Xalqaro maʼlumotlarni uzatish tarmogʻining oʻtkazuvchanlik imkoniyati 2022-yilda 1800 Gbit/s gacha oshdi (2017-yilda 64,2 Gbit/s);
- taʼlim sohasidagi xizmatlar 2,5 marotaba oshdi. Xususiy maktabgacha taʼlim muassasalari soni 833 taga (2017-yilda 250 ta edi), davlat-xususiy sheriklik asosidagi maktabgacha taʼlim muassasalari soni 1313 taga (2018-yilda 250 ta), oilaviy maktabgacha taʼlim muassasalari soni 20676 taga (2018-yilda 579 ta), nodavlat umumtaʼlim muassasalari soni 194 taga (2017-yilda 39 ta), nodavlat oliy taʼlim muassasalari soni 55 taga (2018-yilda 1 ta), xorijiy oliy taʼlim muassasalari soni 30 taga (2017-yilda 7 ta) yetdi;
- sogʻliqni saqlash sohasidagi xizmatlar 2,8 marotaba oshdi va hozirgi kunda 7320 ta xususiy tibbiyot muassasasi (ulardan 5823 tasi ambulatoriya, 1497 tasi statsionar) faoliyat yuritmoqda (2017-yilda 4000 ta edi).
