Rejaga koʻra, sportchilarimiz 12-18-yanvar kunlari Xorvatiya poytaxti Zagreb shahrida oʻtkaziladigan “Gran Prix Zagreb Open-2021” turnirida ishtirok etishadi. Bu yunon-rum kurashi boʻyicha terma jamoamizning bir yillik tanaffusdan soʻng qatnashadigan dastlabki xalqaro musobaqasi hisoblanadi.
Zagreb turniri yakuniga yetishi bilan Xorvatiyaning Porech shahrida xalqaro oʻquv-mashgʻulot yigʻini boshlanadi. “Gran Prix Zagreb Open-2021” musobaqasida qatnashgan aksariyat terma jamoalar 18-29-yanvar kunlari oraligʻida oʻtkaziladigan ushbu xalqaro mashgʻulotlarda ham ishtirok etishni rejalashtirgan.
Shuningdek, Zagreb Gran-prisida hamyurtimiz, Xalqaro toifadagi referi, “Oltin hushtak” sohibi Tohir Gʻulomov hakamlik qiladi.
Maʼlumot uchun, ayni paytda yunon-rum kurashchilarimiz tomonidan Tokio Olimpiadasiga 3 ta litsenziyasi qoʻlga kiritilgan. 2019-yil Qozogʻistonning Nur-Sultan shahrida oʻtgan jahon chempionatida Elmurat Tasmuradov, Jalgasbay Berdimuratov va Rustam Assakalov Olimpiada yoʻllanmasiga sazovor boʻlishgan edi.
Xorvatiyaga milliy terma jamoamiz quyidagi tarkib bilan yoʻl oldi:
-55 kg: Jasurbek Ortiqboyev, Ilhom Bahromov
-60 kg: Islomjon Bahromov, Feruz Toʻxtayev
-63 kg: Elmurat Tasmuradov
-67 kg: Mahmud Baxshulloyev
-72 kg: Aram Vardanyan
-77 kg: Jalgasbay Berdimuratov
-97 kg: Jahongir Turdiyev
-130 kg: Moʻminjon Abdullayev
Murabbiylar - Ravshan Roʻziqulov, Rustam Qudratov, Zaza Silagadze
Hakam - Tohir Gʻulomov
Massajchi - Uzrob Tursunaliyev
Jismoniy tarbiya va sport vazirligi
Matbuot xizmati
