Bu haqda Ukraina Prezidenti Vladimir Zelenskiy dushanba, 8-dekabr kuni kechqurun jurnalistlarga ma'lum qildi. Matbuot anjumani Zelenskiyni Londondan Bryusselga olib ketgan samolyotda bo'lib o'tdi.
“28 band bor edi, endi 20 ta qoldi. Bu yo'nalishni o'zgartirdik va mutlaqo ochiq-oydin Ukrainaga qarshi bo'lgan bandlar olib tashlandi. Amerikaliklar odatda murosaga kelish tarafdori. Albatta, hudud bilan bog'liq murakkab masalalar mavjud. U erda hali murosaga kelinmagan”, deya Zelenskiyning WhatsApp orqali jurnalistlarning savollariga javobanini keltirib o'tadi "Interfaks-Ukraina".
Ukraina hududlarini berish niyatida emas
Jurnalistlar bilan suhbatda Zelenskiy Ukrainaning mamlakat konstitutsiyasiga ham, xalqaro huquqqa ham ko'ra o'z hududlarini berishga haqqi yo'qligini ta'kidladi. “Rossiya, albatta, bizdan hududdan voz kechishimizni talab qilmoqda. Biz hech narsadan voz kechishni istamaymiz – biz aynan shu uchun kurashyapmiz”, deya Ukraina Prezidentining so'zlaridan iqtibos keltirdi "Suspilne".
Nashrning yozishicha, Zelenskiy xavfsizlik kafolatlari masalasiga ham to'xtaldi. “Biz eng kuchli xavfsizlik kafolatlarini AQShdan olishimiz mumkin. Albatta, agar bu Budapesht memorandumi bo'lmasa, bo'sh va'dalar bo'lmasa, agar ular AQSh Kongressida ovozga qo'yilsa”, dedi u.
Yangi reja 9-dekabr kuni AQShga taqdim etiladi
Zelenskiyning so'zlariga ko'ra, Ukraina tomoni tinchlik rejasi ustidagi ishni 9-dekabr kuni kechqurun yakunlaydi va keyin uni AQShga taqdim etadi. “Maslahatchilar [Ukraina Milliy xavfsizlik va mudofaa kengashi kotibi] Rustem Umerov tomonidan taqdim etilgan rejaning so'nggi versiyasi ustida ishlaydi. Yevropalik maslahatchilar Ukraina bilan. Menimcha, reja ertaga tayyor bo'ladi, biz uni yana bir bor ko'rib chiqamiz va keyin uni AQShga yuboramiz”, deya Zelenskiyning so'zlaridan iqtibos keltiradi “RBK-Ukraina”.
4-6-dekabr kunlari Ukraina Milliy xavfsizlik va mudofaa kengashi kotibi Rustem Umerov va Ukraina Qurolli kuchlari Bosh shtabi boshlig'i general Andriy Gnatovdan iborat Ukraina delegatsiyasi Mayamida AQSh vakillari bilan muzokaralar olib bordi. Amerika tomonidan Prezident Donald Trampning maxsus vakili Stiven Uitkoff va Oq uy rahbarining kuyovi Jared Kushner qatnashdi. Muzokaralarning uchinchi kunida Zelenskiy ularga qo'shildi va uning so'zlariga ko'ra, “uzoq va mazmunli telefon suhbati” o'tkazdi, deb xabar berdi dw.com.
